කෘතහස්ථ සිනමාවේදී ආචාර්ය ලෙස්ටර් ජේම්ස් පීරිස් මහතා අභාවප්‍රාප්තවීමෙන් පසු ඔහුගේ දේහය අසල තැන්පත් කොට තිබූ රණමයුර සම්මානය සොරා ගැනීමේ සිද්ධිය සම්බන්ධයෙන් අත්අඩංගුවට පත් පුද්ගලයා මහනුවර ඇසළ පෙරහර පැවැති පළමු දිනයේ දී පෙරහර නැරඹීමට පැමිණි කාන්තාවකගේ මුදල් පසුම්බියක් සොරා ගැනීමට උත්සාහ කිරීමේ සිද්ධියක් සම්බන්ධයෙන් සැකපිට අත් අඩංගුවටපත්ව තිබේ.
ආචාර්ය ලෙස්ටර් ජේම්ස් පීරිස් මහතා ගම්පෙරළිය චිත්‍රපටය අධ්‍යක්ෂණය කිරීම වෙනුවෙන් නවදිල්ලි සිනමා උළෙලේදී පිරිනැමුණු රණමයුර සම්මානය මෙම සැකකරු විසින් සොරාගෙන ගොස් තිබූ බව පොලිසිය කියයි .
එම සොරා ගැනීමේ සිද්ධිය සම්බන්ධයෙන් පොලිසිය දීර්ඝ විමර්ශනයක් සිදුකිරීමෙන් අනතුරුව සැකකරු හඳුනාගෙන ඔහු අත්අඩංගුවට ගැනීමට පියවර ගෙන තිබුණි .
පොලිස් අපරාධ කොට්ඨාසයේ ලියාපදිංචි අපරාධකරුවෙකු වශයෙන්නම සඳහන්ව ඇති 71 හැවිරිදි මෙම සැකකරු ප්‍රථම කුඹල් පෙරහර වීදි සංචාරය කළ දිනයේ ජනතාව අතර තෙරපෙමින් කාන්තාවකගේ අත් බෑගයක තිබූ මුදල් පසුම්බියක් සොරාගැනිමට උත්සාහ කළ අවස්ථාවේ දී අවට ජනතාව ගේ ද සහාය ඇතිව සැකකරු අත්අඩංගුවට ගැනීමට පොලිසියටහැකිව තිබේ .
