ගම්පහ දිස්ත්‍රික්කයේ සිටින ශ්‍රවණාබාධිත පුද්ගලයින් සඳහා සැහැල්ලු වාහන රියදුරු බලපත්‍ර නිකුත් කිරීමේ නියමු වැඩසටහන ප්‍රවාහන හා මහාමාර්ග අමාත්‍යාංශය විසින් අද (16) ආරම්භ කරන ලදී.
ඒ අනුව, තාවකාලික රියදුරු බලපත්‍ර (Learner’s Permit) ප්‍රවාහන රාජ්‍ය අමාත්‍ය ලසන්ත අලගියවන්න මහතා අතින් අද මෝටර් රථ ප්‍රවාහන දෙපාර්තමේන්තුවේ ගම්පහ කාර්යාලයේදී නිකුත් කෙරුණු අතර, මාස 3ක ප්‍රායෝගික පුහුණුවකින් පසු ඔවුන්ට ස්ථිර බලපත්‍රය ලැබෙනු ඇත.
පසුගිය 06දා රියදුරු බලපත්‍රයක් ලබාගැනීම සඳහා අයදුම්කරුවන් වෛද්‍ය පරීක්ෂණයකට මෙන්ම ලිඛිත පරීක්ෂණයකට යොමු කෙරුණු අතර, ලිඛිත පරීක්ෂණය සඳහා පෙනී සිටි පුද්ගලයන් 76 දෙනෙකු අතුරින් 44 දෙනෙකු සමත් වී තිබේ.
සංඛ්‍යාලේඛන දෙපාර්තමේන්තුවේ වාර්තාවලට අනුව මෙරට ශ්‍රවණාබාධ සහිත පුද්ගලයන් 388,000ක් පමණ සිටින අතර, ඉන් 39,000ක් සිටින්නේ ගම්පහ දිස්ත්‍රික්කයේය. දිවයිනේ විවිධ ප්‍රදේශ වල සිටින ශ්‍රවණාබාධිත පුද්ගලයන් 1,000කට ආසන්න පිරිසක් රියදුරු බලපත්‍ර සඳහා ඉල්ලුම් කර ඇති බවද පැවසේ.
