සුදත්ත තිලකසිරි නොහොත් “සුදා”යන අය “මාලිමාවේ සැබෑ අදිටන“යන ටැගය (Tag) යටතේ ඔහුගේ යූ ටියුබ් නාලිකාව හරහා සහ සමාජ මාධ්‍යවලින් ඉදිරිපත් කරන තර්ජනාත්මක වැකි නිසා බිහිසුණු ලේ වැගිරීම් හා දේපළ විනාශ කිරීම් සහිත ප්‍රචණ්ඩ ක්‍රියා සිදුවිය හැකි බැවින් වෛරී ප්‍රකාශන සිදු කිරීමට එරෙහිව ඊට සම්බන්ධ පුද්ගලයන් අත්අඩංගුවට ගෙන නීතිය ක්‍රියාත්මක කරන ලෙස කොළඹ දිස්ත්‍රික් මැතිවරණ ආරවුල් නිරාකරණ මධ්‍යස්ථානය විසින් ප්‍රජා පොලිස්, සංචාරක, ආයෝජන හා මැතිවරණ කටයුතු බාර ජ්‍යෙෂ්ඨ නියෝජ්‍ය පොලිස්පතිවරයාට ලිඛිතව දැනුම් දී ඇත.
කොළඹ දිස්ත්‍රික් මැතිවරණ ආරවුල් නිරාකරණ මධ්‍යස්ථානයේ ප්‍රධාන සහකාර තේරීම්භාර නිලධාරී එස්.ඒ.එන්.ආර්.සුබසිංහ මහතා විසින් අදාළ ලිපිය ජ්‍යෙෂ්ඨ නියෝජ්‍ය පොලිස්පතිවරයාට යොමුකර තිබේ.
මෙම වීඩියෝ පට මගින් “අපි තොපිලට උඹලට ගහනවා බලාගෙන හිටපල්ලා“,“අලි ටිකයි, පොහොට්ටුකාරයොයි, ටෙලිෆෝන්කාරයෝයි බලාගෙන හිටපල්ලා, මේ ඉන්නේ අපේ රණවිරුවෝ, බලපල්ලා, තොපිලා“, “ඡන්දෙ දීලා වැඩක් නැහැ. ගනුදෙනු ටිකක් තියෙනවා බේරා ගන්න “(සමන්ත විද්‍යාරත්න),“රජය යනු මර්ධන ආයතනයකි“ (කේ.ඩී. ලාල්කාන්ත) තර්ජනාත්මක වැකි ඉදිරිපත් කර ඇතැයි ද අදාළ ලිපියේ දැක්වේ.
මෙම වැකිවලින් යමකු බිය ගැන්වීමක්, තැති ගැන්මක් සිදුවිය හැකි බවත්, මේ සම්බන්ධයෙන් අප්‍රමාදව කටයුතු නොකළහොත් පශ්චාත් මැතිවරණ ප්‍රචණ්ඩ ක්‍රියා අති බිහිසුණු ලෙස ව්‍යාප්ත වියහැකි බවත්, එම තත්ත්වය දේශීය හා විදේශීය වශයෙන් අපකීර්තියක් ඇතිවන බවත් සඳහන් කර ඇත.
මෙවැනි තත්ත්වයක් යටතේ පශ්චාත් මැතිවරණ ප්‍රචණ්ඩ ක්‍රියා වැළැක්වීමට උපරිම ක්‍රියාමාර්ග ගන්නා ලෙසත්, රජයේ ඉහළ නිලතල දරන හා දැරූ පුද්ගලයන්ගේ විශේෂයෙන්ම ආරක්ෂක අංශ නිලධාරීන්ගේ දේපොල හා ජීවිත ආරක්ෂාව සම්බන්ධයෙන් විධිමත් ක්‍රියාමාර්ගයක් ගන්නා ලෙසත් ප්‍රධාන සහකාර තේරීම්භාර නිලධාරිවරයා ඉල්ලා සිටී.
මූලාශ්‍රය – අරුණ
