පසුගිය වසරේ  (2023)  ශ්‍රී ලංකාවේ අපනයන ආදායම ඇමරිකානු ඩොලර් මිලියන 11911 වශයෙන් සටහන් වේ. එය පෙර වසරට (2022) සාපේක්ෂව 9.1%ක පහළ යාමක් බව මහ බැංකුව පෙන්වා දෙයි.

මෙලෙස අපනයන ආදායම පහළ යෑමට ප්‍රධාන හේතුව වූයේ මෙරට තනි අපනයන භාණ්ඩය වන රෙදිපිළි හා ඇඟලුම් ආදායමේ පහල යාම බවද මහ බැංකුව සඳහන් කරයි.

ඉකුත් 2022 වසරට සාපේක්ෂ 2023 වසරේ රෙදිපිළි ඇඟලුම් අපනයන ආදායම 18% කින් පහළ ගොස් තිබේ.

ශ්‍රී ලංකාවේ අපනයන මිල දී ගන්නා ප්‍රධාන රටවල ජීවන වියදම ඉහළ යාම, ආර්ථික අවපාතය හා භූ දේශපාලනික ගැටළු ආදී ගෝලීය සාධක ද මෙම අපනයන ආදායම පහල යාම කෙරෙහි බලපෑම් කර ඇති බව මහ බැංකුව විසින් වැඩිදුරටත් පෙන්වා දෙන ලදී.

විදුලිබිල අඩු කිරීමට අදාළ යෝජනා ලංකා විදුලිබල මණ්ඩලය විසින් මෙතෙක් මහජන උපයෝගීතා කොමිසම වෙත ලබා දී නොමැති බව එහි සභාපති මහාචාර්ය මංජුල ප්‍රනාන්දු මහතා ප්‍රකාශ කර සිටී.

අදාළ යෝජනා මැයි මස පළමු වැනිදා කොමිසම වෙත ලබාදීමට නියමිතව තිබූ නමුත් විදුලිබල මණ්ඩලය සිදුකළ ඉල්ලීමක් මත එම කාලය හෙට (10) දින දක්වා දීර්ඝ කිරීමට මහජන උපයෝගීතා කොමිසම පියවර ගෙන තිබේ.

ඒ අනුව හෙට දිනට පෙර එම යෝජනා ලබාදෙන ලෙස මහජන උපයෝගීතා කොමිසම ලංකා විදුලිබල මණ්ඩලය වෙත දැනුම් දී ඇත.

අදාළ යෝජනා ලැබීමෙන් පසු විදුලිබිල අඩු කිරීම සඳහා වන ක්‍රියාදාමය ආරම්භ කෙරෙන අතර විදුලිබිල අඩු කිරීමේ ප්‍රතිශතය ජූලි මාසයේ දී ප්‍රකාශ කළ හැකි බව මහාචාර්ය මංජුල ප්‍රනාන්දු මහතා ප්‍රකාශ කලේය.

දකුණු අප්‍රිකාවේ පැවති විස්සයි විස්ස සහ එක් දින තරගාවලි දෙකම සහ ඩුබායි හි පැවති ලෝක කුසලාන විස්සයි විස්ස තරගාවලියට සුදුසුකම් ලැබීමේ තරඟ සියල්ල ද ජයග්‍රහණය කළ ශ්‍රී ලංකා කාන්තා ක්‍රිකට් කණ්ඩායම අද (09) අලුයම කටුනායක ගුවන් තොටුපොළ වෙත පැමිණියහ.

මෙම ශ්‍රී ලංකා කාන්තා ක්‍රිකට් කණ්ඩායම මෙසේ යළිත් මෙරටට පැමිණියේ මාස දෙකක, ක්‍රිකට් තරඟ සංචාරයන් දෙකක් ජයග්‍රහණය කිරීමෙන් අනතුරුවය.

ගුවන් තොටුපොළේ දී අදහස් දැක්වූ ශ්‍රී ලංකා කණ්ඩායමේ නායිකා චමරි අතපත්තු මෙසේ පැවසීය .

“අපට මෙම ජයග්‍රහණය කිරීම සදහා කණ්ඩායමේ දක්ෂ යොවුන් ක්‍රීඩිකාවන් මෙන්ම ජ්‍යෙෂ්ඨ ක්‍රීඩිකාවන් ද විශාල සහයක් ලබා දුන්නා…. “

එළඹෙන ඔක්තෝබර් මාසයේ බංග්ලාදේශයේ පැවැත්වෙන විස්සයි විස්ස ලෝක කුසලාන තරගාවලියට පෙර බටහිර ඉන්දීය කොදෙව් දූපත් කණ්ඩායම සමඟ තරගාවලියක් ද , ආසියානු කුසලාන විස්සයි විස්ස තරගාවලිය සහ අයර්ලන්තයේ ක්‍රිකට් තරගාවලි සංචාරයක් ද සදහා ශ්‍රී ලංකා කාන්තා ක්‍රිකට් කණ්ඩායම සහභාගී වීමට නියමිත බව ද ඇය පැවසුවාය .