ශ්‍රී ලංකාව විදේශ ණය ප්‍රතිව්‍යුහගතකරණය කළ ද ජපානයේ මූල්‍ය ආධාරවලින් ඉදිකිරීමට යෝජිත සැහැල්ලු දුම්රිය ව්‍යාපෘතියේ වැඩ ආරම්භ කිරීම අවිනිශ්චිත තත්වයකට පත්ව ඇති බව වාර්තාවේ.

එම සැහැල්ලු දුම්රිය ව්‍යාපෘතිය හිටපු ජනාධිපති ගෝඨාභය රාජපක්‍ෂ මහතාගේ පාලන සමයේ දී අතහැර දැමීම නිසා එම යෝජනාව පිළිබඳව ජපානය සලකා නොබලන බවත් එය සලකා බැලීමට නම් නව ව්‍යාපෘතියක් ලෙස නැවත ඉදිරිපත් කළ යුතු බවත් ජපානය පවසා ඇතැයි දැනගන්නට තිබේ.

නව ව්‍යාපෘතියක් ලෙස සැහැල්ලු දුම්රිය ව්‍යාපෘතිය ඉදිරිපත් කළ ද ශ්‍රී ලංකාවට ඇති ණය ගෙවීමේ හැකියාව පිළිබඳව අවධානය යොමු කර ඒ පිළිබඳව ජපානය තීරණයක් ගැනීමට නියමිතය.

මේ අතර ශ්‍රී ලංකාව විදේශ ණය ප්‍රතිව්‍යුහගත කිරීමෙන් පසුව මෙරට ක්‍රියාත්මක කිරීමට නියමිත සෙසු ජපාන ව්‍යාපෘති ආරම්භ කිරීමට ජපාන රජය එකඟතාව පළකර ඇති අතර කොළඹ බණ්ඩාරනායක ජාත්‍යන්තර ගුවන්තොටුපොළ පුළුල් කිරීමේ ව්‍යාපෘතිය ද ඒ අතර වේ.

ජපාන විදේශ අමාත්‍ය යොකෝ කමිකාවා මහත්මිය මෙරටට පැමිණ කළ සාකච්ඡාවලදී එම ව්‍යාපෘති පිළිබඳව අවධානය යොමු කර තිබේ

(ලංකාදීප )

ශ්‍රී ලංකා කාන්තා කණ්ඩායම ලෝක කුසලාන 20යි 20 ක්‍රිකට් තරගාවලියට සුදුසුකම් ලබා ගන්නා ලදී.

ඒ ඊයේ (05) පැවති සුදුසුකම් ලබාගැනීමේ තරගාවලියේ පළමු අවසන් පූර්ව තරගයේදී එක්සත් අරාබි එමීර් රාජ්‍ය කාන්තා කණ්ඩායම ලකුණු 15කින් පරාජයට පත් කිරීමත් සමඟය.

අවසන් මහා තරගයේ දී ශ්‍රී ලංකාව සහ ස්කොට්ලන්තය තරග වැදීමට නියමිතය.

ශ්‍රී ලංකාව සහ ස්කොට්ලන්තය යන කණ්ඩායම් දෙකම මෙම වසරේ බංග්ලාදේශයේ පැවැත්වීමට නියමිත කාන්තා 20යි 20 ලෝක කුසලාන තරගාවලිය ට සුදුසුකම් ලබා ගැනීමට සමත් විය.

මේ අතර ඊයේ පැවති තරගයේ පළමුව පන්දුවට පහරදුන් ශ්‍රී ලංකා කාන්තා කණ්ඩායම නියමිත පන්දුවාර 20 අවසානයේ කඩුලු 06ක් දැවී ලකුණු 149ක් ලබා ගත් අතර,

ශ්‍රී ලංකා ඉනිම වෙනුවෙන් විශ්මි ගුණරත්න ලකුණු 45ක් ලබා ගැනීමට සමත්වූවාය.

පිළිතුරු ඉනිම සඳහා පහරදුන් එක්සත් අරාබි එමීර් රාජ්‍ය කාන්තා කණ්ඩායමට නියමිත පන්දුවාර 20 අවසානයේ කඩුලු 07ක් දැවී ලබාගත හැකිවුයේ ලකුණු 134ක් පමණි.

ඒත් සමඟ ශ්‍රී ලංකා කණ්ඩායමට ලකුණු 15ක ජයක් හිමිවිය.

පන්දු යැවීමේ දී චමරි අතපත්තු ලකුණු 28කට කඩුලු 02ක් දවා ගත්තාය.

නරියාකන්දේ සුපර් ක්‍රොස් තරගාවලියේ සිදු වූ රිය අනතුරේදී මෝටර් රථ ධාවකයන්ට සහාය නොදැක්වීම නිසා ඉදිරියේදී ඔටෝ මොබයිල් සංගමය (SLAS)  මගින් සංවිධානය කරන කිසිදු තරගාවලියකට තමන් සහභාගි නොවන බවට SLARDA හෙවත් මෝටර් රථ ධාවකයන්ගේ සංගමය ප්‍රකාශ කරයි. 

ශ්‍රී ලංකා යුද හමුදාව හා ඔටෝමෝබයිල් සංගමය එක්ව සංවිධානය කරන ලද නරියාකන්ද ෆොක්හිල් සුපර් ක්‍රොස් තරගාවලියේ 18 වැනි තරගයේදී මෝටර් රථ ධාවකයන් දෙදෙනකු විසින් දූවිලි නිසා රථ හැසිරවීමට නොහැකි වීමෙන් ධාවන පථයෙන් පිටතට යාම නිසා ධාවන පථය අයිනේ සිටි තරග මාෂල් වරුන් තිදෙනකු ඇතුළු නරඹන්නන් හත් දෙනකු මිය ගිය අතර 23 දෙනකු තුවාල ලැබූහ. 

මෙම ධාවකයන් දෙදෙනාද තුවාල ලබා රෝහල්ගතව සිටියදී දියතලාව පොලිසිය මගින් ඔවුන් දෙදෙනා අත් අඩංගුවට ගෙන උසාවියට ඉදිරිපත් කළ පසු රක්ෂිත බන්ධනාගාර ගත කරනු ලැබීය. 

මෙම සිද්ධියේදී තරගයක් අතරතුර ධාවන පථයේ සිදු වූ අනතුරක් මහ මග අනතුරක් සේ සළකා කටයුතු කළ දියතලාව පොලිසියට තරයේ අවවාද කළ බණ්ඩාරවෙල මහේස්ත්‍රාත්වරයා ධාවකයන් දෙදෙනා නිදහස් කර හරින ලදී. 

මෙහිදී එම ධාවකයන් දෙදෙනා මත් ද්‍රව්‍ය හෝ මත් වතුර භාවිතා කර තිබේද යන්නත් පරීක්ෂා කළ දියතලාව පොලිසිය ඔවුන් උසාවියට ඉදිරිපත් කර තිබුණේ අධික වේගයෙන් රිය පදවා මනුෂ්‍ය ඝාතන සිදු කළ බවට චෝදනා කරමිනි. 

පොලිසියේ මේ චෝදනා විහිළුවක් වනුයේ මෝටර් රථ ධාවන තරගයක අධික වේගයෙන් මිස හෙමින් ධාවනයක් නොවන නිසාත් තරගයක් අතර තුර ධාවන පථයක සිදුවන අනතුරක් මහා මාර්ගයේ සිදුවන සාමාන්‍ය අනතුරක් සේ සළකා චෝදනා පත්‍රය සකස් කිරීමයි. 

වාර්තා වන අන්දමට දියතලාව පොලිසිය මෙසේ කටයුතු කර ඇත්තේ සංවිධායකයන්ගේ වැරැද්ද වසා ගැනීමට ඉහළින් ආ බලපෑමක් අනුව බවයි.

මේ අනතුර සම්බන්ධයෙන් සොයා බැලීම සඳහා යුද හමුදාවෙන් 7දෙනෙකුගෙන් සමන්විත පරීක්ෂණ කමිටුවක් හා ඔටෝ මොබයිල් සංගමයෙන් (SLAS)  තිදෙනෙකුගෙන් සමන්විත කමිටුවක් පත් කළ ද මෙතෙක් අදාළ අනතුර සම්බන්ධ පරීක්ෂණ වාර්තා ලැබී නැතැයි පැවසේ.

 සබැඳි පුවත්:

7ක් මැරුණ දින රෑ නරියා කන්දේ සංවිධායකයෝ පාටි දාලා (වීඩියෝ)

ෆොක්ස්හිල්‘ අනතුරේ රියැදුරන් රිමාන්ඩ් 
ෆොක්ස් හිල් සුපර් ක්‍රොස් හි දරුණු අනතුරක් 5ක් මරුට (Update)