Connect with us

පුවත්

ගණිකා ජාවාරම් කළ ඕමාන එම්බසි ලොක්කා හා 57ක් කොටුවෙයි!

Published

on

ගෘහ සේවිකාවන් ලෙස රැකියා ලබා දෙන බව පවසා ඕමානයට කාන්තාවන් රැගෙන ගොස් ගණිකා වෘත්තියේ යෙදවීමේ ජාවාරමට සම්බන්ධ ඒජන්සිකරුවන්, රජයේ නිලධාරීන් ඇතුළුව පනස් හත් දෙනෙක් අත්අඩංගුවට ගැනීමට පොලිසිය පරීක්ෂණ කටයුතු ආරම්භ කර ඇතැයි වාර්තා වේ.

එම පිරිස අතරට විදේශ සේවා නියුක්ති කාර්යාංශය ඕමාන තානාපති කාර්යාලයට පත් කළ නිලධාරියකුද සිටින බවත්, ඔහු එරට රැකියාවට ගිය කාන්තාවන් බලහත්කාරයෙන් දූෂණය කළ අයකු ලෙස හඳුනාගෙන ඇති බවත් මේ සියල්ල ළඟදීම ජනාධිපතිවරයාට ලබාදීමට නියමිත වාර්තාවේද සඳහන් බවත් පොලිසිය පවසයි.

එම නිලධාරියාට එරෙහිව දූෂණයට ලක් වූ කාන්තාවන් විසිදෙනකු පැමිණිලි මෙරටට රැගෙන විත් ඇත.

මැද පෙරදිග රටවලට කාන්තාවන් රැගෙන ගොස් ගණිකා වෘත්තියේ යෙදවීමට සම්බන්ධවූවන් සොයා බැලීමට ජනපති රනිල් වික්‍රමසිංහගේ උපදෙස් මත ඕමානයට ගිය අපරාධ පරීක්ෂණ දෙපාර්තමේන්තුවේ සහ රාජ්‍ය ඔත්තු සේවාවේ නිලධාරීන් මෙම තොරතුරු හෙළිකරගෙන තිබේ.

මෙම ජාවාරමට ප්‍රධාන පෙලේ විදේශ රැකියා ඒජන්සි දොළහක්, උප ඒජන්සි හතක්, ඕමානයේ සිටින ශ්‍රී ලාංකික බ්‍රෝකර්වරුන් හතක්, ඩුබායිහි සිටින බ්‍රෝකර්වරුන් හතක් හා ලංකාවේ සිටින බ්‍රෝකර්වරුන් පහළොවක් දැනට සාක්ෂි සහිතව හඳුනාගෙන ඇති බවද වාර්තා වේ.

මෙම ජාවාරම්කරුවන් රටේ සෑම තැනකම සිටින දික්කසාද වූ තරුණියන්, ස්වාමියා මත්ද්‍රව්‍යවලට හුරු වූ කාන්තාවන්, ආර්ථික අපහසුතා ඇති කාන්තාවන් හඳුනාගෙන ඔවුන් එක් රැස්කිරීමට ග්‍රාමීය මට්ටමින් උප ඒජන්තවරුන් පත්කර ඇතැයි ද හෙළි වී තිබේ.

එහිදී එම හඳුනාගන්නා කාන්තාවන්ට විදෙස් රැකියා දෙන බව කියා රුපියල් හතළිස් දහසක් අතට දී දවසින් කොළඹට රැගෙනවිත් එක්දින සේවාව යටතේ ගුවන් ගමන් බලපත්‍ර පවා සකස් කරදීම සිදුකරන බවද හෙළි වී ඇත.

සංචාරක වීසා මගින් මෙම කාන්තාවන් ඩුබායි වෙත යැවෙන අතර එහි දී තැරැව්කරුවන් මෙම කාන්තාවන් ගුවන් තොටුපොළෙන් භාරගෙන වාහනවලින් අල්බුරෙහි දේශ සීමාව හරහා බස්මගින් ඕමානයට රැගෙන යන බව හෙළි වී ඇත. 

ඕමානයේ මස්කට් ගුවන් තොටුපොළින් සෘජුවම රැගෙන එන අයවද ඒජන්සිකරුවන් ඔවුන්ගේ රැඳවුම් මධ්‍යස්ථානයට ගෙන එන බව හෙළි වී ඇත.

ඩුබායි හා ඕමාන් ඔස්සේ රැඳවුම් මධ්‍යස්ථානයට රැගෙන විත් එම කාන්තාවන්ගේ දුරකතන හා ගමන් බලපත්‍ර ජාවාරම්කරුවන් භාරයට ගෙන කාන්තාවන්ගේ වීඩියෝවක් ගෘහ සේවිකාවන් සොයන ඒජන්සි වෙත යොමුකරන්නේය.

මෙසේ අසරණ වූ කාන්තාවන් රඳවා තබන විදේශ සේවා නියුක්ති කාර්යාංශයේ ඕමාන රැඳවුම් මධ්‍යස්ථානයේ කාන්තාවන්ද අතවරයට ලක්ව ඇතැයි ද හෙළි වී තිබේ.

මේ අතර, මෙම චෝදනාවට ලක්වන නිලධාරියා සම්බන්ධ වාර්තාව තමන් වෙත මෙතෙක් ලැබී නොමැති බවත් විමර්ශන වාර්තාව ලද විගස ඔහුට විරුද්ධව පියවර ගන්නා බවත් විදේශ සේවා නියුක්ති කාර්යාංශයේ සභාපති මහේන්ද්‍ර කුමාරසිංහ මහතා මාධ්‍යට හෙළිකර ඇත.

පුවත්

වෙසක් උත්සව ආරක්ෂාව වෙනුවෙන් පොලීසිය සූදානමින්

Published

on

By

මෙවර වෙසක් උත්සවය වෙනුවෙන් ආරක්ෂාව සඳහා පොලිස් නිලධාරීන් 18,000කට වැඩි සංඛ්‍යාවක් දිවයින පුරා යෙදවීමට කටයුතු සූදානම් කර ඇති බව පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරි නීතිඥ නිහාල් තල්දූව මහතා පවසයි.

අවශ්‍යතාවය අනුව පොලිස් විශේෂ කාර්ය බලකා නිලධාරීන් 275කට ආසන්න සංඛ්‍යාවක් යෙදවීමට කටයුතු කරන බවයි මාධ්‍ය ප්‍රකාශකවරයා වැඩිදුරටත් පැවසීය.

පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරි නීතිඥ නිහාල් තල්දූව මහතා සඳහන් කළේ, දිවයින පුරා වෙසක් කලාප 419ක් සංවිධානය කර ඇති අතර,එමෙන්ම තොරණ 321ක් දිවයින පුරා ඉදිවෙන බවය.

ඊට අමතරව දන්සැල් 4726ක් සංවිධානය කර ඇති බවට තොරතුරු ලැබී ඇති බවද  පොලිස් මාධ්‍ය ප්‍රකාශකවරයා වැඩිදුරටත් සඳහන් කර සිටියේය.

Continue Reading

පුවත්

විදුලි සැර වැදී පුද්ගලයෙක් මරුට

Published

on

By

මුන්දලම – බරලන්කට්ටුව ප්‍රදේශයේ සිය සත්ත්ව ගොවිපලේ විදුලි අළුත්වැඩියා කටයුත්තක් කරමින් සිටි ව්‍යාපාරිකයෙකු විදුලිය සැර වැදීමෙන් මිය ගොස් ඇති බව මුන්දලම පොලීසිය පවසයි.

මිය ගොස් ඇත්තේ ගම්පහ – ඉඹුල්ගොඩෙ පදිංචිව සිටි මොනර පිටිකුඹුරමුල්ලගේ සනත් කුමාර නම් අයෙකි.

මිය ගොස් ඇති පුද්ගලයා ඉකුත් 20 වැනිදා සවස තමන් විසින් ප්‍රදේශයේ පවත්වා ගෙන යන සත්ත්ව ගොවිපලක දොරක් අළුත්වැඩියා කරමින් සිට ඇත.

එම අවස්ථාවේ ඇති වූ විදුලිය කාන්දුවීමකින් ඔහු අනතුරට පත්ව ඇතැයි පොලීසිය ප්‍රකාශ කලේය.

Continue Reading

පුවත්

නාවිකයන්ට හා ධීවරයන්ට රතු නිවේදනයක්

Published

on

By

තද වැසි සහ තද සුළං සහ රළු මුහුද පිළිබඳ අනතුරු ඇඟවීමේ රතු නිවේදනයක් නිකුත් කර තිබේ.

ඒ අනුව කල්පිටිය සිට කොළඹ, ගාල්ල සහ හම්බන්තොට හරහා පොතුවිල් දක්වා වන මුහුදු ප්‍රදේශවල ජනතාවට සැලකිලිමත් වන ලෙස දැනුම් දී තිබේ.

කොළඹ සිට ගාල්ල සහ හම්බන්තොට හරහා පොතුවිල් දක්වා වෙරළට ඔබ්බෙන් වන මුහුදු ප්‍රදේශවල සුළඟේ වේගය විටින් විට පැ.කි.මී 60 – 70 දක්වා වැඩි වන අතර මුහුදු ප්‍රදේශ විටින් විට ඉතා රළු වේ.

මෙම මුහුදු ප්‍රදේශයට නැවත දැනුම්දෙන තුරු යාත්‍රා නොකරන ලෙස නාවික හා ධීවර ප්‍රජාවන්ට ද දැනුම් දී තිබේ.

කල්පිටිය සිට කොළඹ, ගාල්ල සහ හම්බන්තොට හරහා පොතුවිල් දක්වා වෙරළට ඔබ්බෙන් වන මුහුදු ප්‍රදේශවල මුහුදු රළ උස මීටර් 2.5 – 3ක් පමණ ඉහළ යෑමේ හැකිවක් පවතින බව ද කාලගුණවිද්‍යා දෙපාර්තමේන්තුව නිවේදනය කරයි.

මේ හේතුවෙන් කොළඹ සිට ගාල්ල හරහා මාතර දක්වා ප්‍රදේශවල මුහුදු රළ ගොඩබිමට පැමිණීමේ හැකිවක් පවතී.

Continue Reading
Advertisement

Trending

Copyright © 2023 Sri Lanka Mirror. All Rights Reserved