Connect with us

විදෙස්

තෙවැනි වරටත් ෂී ජින්පින් බලයට ; චීනය තවදුරටත් ලෝකයට විවෘත වන බව කියයි (වීඩියෝ)

Published

on

චීනයේ කොමියුනිස්ට් පක්ෂයේ (CPC) මධ්‍යම කාරක සභාවේ ප්‍රධාන ලේකම් ෂී ජින්පින් මහතා තෙවැනි වරටත් තේරී පත්වී තිබේ.

මේ පිළිබඳව අද (23) පෙරවරුවේ බීජිං හි පැවති මාධ්‍ය හමුවකදී නිල වශයෙන් ප්‍රකාශයට පත්කෙරුණි.

ඊට අමතරව, ඔහු CPC පක්ෂයේ මධ්‍යම හමුදා කොමිසමේ සභාපතිවරයා ලෙසද තෝරා පත්කරගෙන තිබේ.

අද දින මාධ්‍ය හමුව අමතමින් චීන ජනාධිපතිවරයා පැවසුවේ, ලෝකයට චීනයේ දොරටු තවදුරටත් විවර කරන බවත්, ඉදිරියේදී ගැඹුරු ප්‍රතිසංස්කරණ සිදුකිරීමට දිගටම කටයුතු කරන බවත්ය.

චීනයට ලෝකයෙන් හුදෙකලා වී දියුණු විය නොහැකි සේම, සංවර්ධනය සඳහා ලෝකයටද චීනය අවශ්‍ය බවත්, පසුගිය වසර 40 ක් පුරාවට නොනැවතුනු ප්‍රතිසංස්කරණ ඔස්සේ චීනයේ අදහාගත නොහැකි වේගවත් ආර්ථික වර්ධනයක් සහ දිගුකාලීන සමාජ ස්ථාවරත්වයක් නිර්මාණය වී ඇති බවත් ෂී මහතා පැවසීය.

විශාල ඔරොත්තු දීමේ හැකියාවක් හා විභවයක් ඇති චීන ආර්ථිකයේ ශක්තිමත් මූලිකාංග වෙනස් නොවනු ඇති බවත්, එය දිගු කාලීනව ධනාත්මක මාවතක ඔස්සේ පවතිනු ඇති බවත් ඔහු වැඩිදුරටත් කියා සිටියේය.

පසුගිය දින පුරාවට චීන කොමියුනිස්ට් පක්ෂයේ (CPC) 20 වැනි ජාතික කොංග්‍රසය පැවැත්වුණු අතර, එහිදී අලුතින් තේරී පත්වූ මධ්‍යම කාරක සභා සභිකයින්ද මෙම මාධ්‍ය හමුවට එක්විය.

(CPC 20 වැනි ජාතික කොංග්‍රසය පුරාවටම, ‘Sri Lanka Mirror’ හි විශේෂ වාර්තාකරු ලෙස අප ප්‍රධාන කර්තෘ කැළුම් ශිවන්ත මහතා බීජිං අගනුවර සිට එම කොංග්‍රසය විස්තරාත්මක ලෙස ආවරණය කළ අතර, අප මාධ්‍ය සහකරු වන CCTV+ රූපවාහිනී සේවය ඔස්සේ මෙහි සජීවී දසුන්ද ඔබ හමුවේ තැබීමට අපි සමත් වීමු.)

– කැළුම් ශිවන්ත බීජිං සිට

(වීඩියෝ : CCTV +)

විදෙස්

මේ මාසයේදී ඇෆ්ගන් ජාතිකයන් 19,500ක් පාකිස්තානයෙන් පිටුවහල් කරලා!

Published

on

By

පාකිස්තානය විසින් අප්‍රේල් මාසය තුළදී මේ දක්වා එරට නීතිවිරෝධීව රැඳී සිටි ඇෆ්ගන් ජාතිකයන් 19,500 කට වැඩි පිරිසක් පිටුවහල් කර ඇති බව එක්සත් ජාතීන්ගේ සංවිධානය පවසයි.

අප්‍රේල් මස 30දාට පෙර පාකිස්තානයෙන් පිටව යන ලෙස එරට බලධාරීන් සිදුකර ඇති දැනුම් දීම මත මේ වනවිට 80,000ක් පමණ මේ දක්වා එරටින් පිටව ගොස් ඇතැයි වාර්තා වේ.

දිනකට ඇෆ්ගන් පවුල් 700ක් – 800ක් පමණ පාකිස්තානයෙන් මෙලෙස පිටුවහල් කෙරෙන බව තලෙයිබාන් බලධාරීන් පවසා ඇත.

බීබීසී ලෝක සේවය වාර්තා කර ඇත්තේ ඉදිරි මාස කිහිපය තුළ මෙලෙස පිටුවහල් කරන පිරිස මිලියන 02ක් දක්වා ඉහළ යා හැකි බවයි.

තලෙයිබාන් බලධාරීන් හා සාකච්ඡා පැවැත්වීමට පකිස්තානු විදේශ අමාත්‍ය – ඉෂාක් ඩාර් ඊයේ දින කාබුල් වෙත ගොස් තිබුණු අතර, එහිදී ඇෆ්ගනිස්තාන් විදේශ අමාත්‍යවරයා වන අමීර් ඛාන් මුත්තකිද මෙම පිටුවහල් කිරීම් පිළිබඳව “ගැඹුරු කනස්සල්ල” පළ කර තිබුණි.

මෙලෙස පිටුවහල් කෙරුනු ඇතැම් ඇෆ්ගන් ජාතිකයන් පවසා ඇත්තේ යුද ප්‍රහාර හේතුවෙන් සිය දෙමාපියන් පාකිස්තානයට පළා යාමෙන් අනතුරුව තමන් පාකිස්තානයේ උපත ලැබුවන් බවයි.

2021 දී ඇෆ්ගනිස්තානය තලේබාන් ආදිපත්‍යය යටතට පත්වීමෙන් අනතුරුව පාකිස්තානයට පළාගිය 700,000 ක් පමණ ජනකායක් ඇතුළුව, මිලියන 3.5 කට අධික ඇෆ්ගන් ජාතිකයින් පිරිසක් පාකිස්තානයේ ජීවත් වන බව එක්සත් ජාතීන්ගේ සරණාගත ඒජන්සිය පවසයිත

ඔවුන්ගෙන් අඩකට අධික පිරිසක් නීත්‍යානුකූල ලිපිලේඛන ද නොමැතිව නීතිවිරෝධීව සිටින බව එක්සත් ජාතීන්ගේ සංවිධානය ඇස්තමේන්තු කරයි.

Continue Reading

විදෙස්

කොලොම්බියාවේ  කහ උණ වසංගතයක්

Published

on

By

කොලොම්බියාවේ නගර රැසක කහ උණ වසංගතයක් පැතිර යමින් පවතින බව විදෙස් මාධ්‍ය වාර්තා කරයි.

පසුගිය වසරේ දී ආරම්භ වූ මෙම වසංගතයෙන් මේ වනවිට රෝගීන් 74ක් වාර්තා වී ඇති අතර, ඉන් 34ක්ම මියගොස් ඇත.

පවතින අවදානම් සහගත සෞඛ්‍ය තත්ත්වයෙන් වැඩි බලපෑමක් එල්ලවී ඇත්තේ ඉහළ දෙස් විදෙස් සංචාරක ආකර්ෂණයක් දිනා ඇති එරට නැගෙනහිර ටොලිමෝ පළාතටය.

ඒ අනුව පවතින තත්ත්වය සැලකිල්ලට ගනිමින් එරට රජය හදිසි සෞඛ්‍ය තත්ත්වයක් නිවේදනය කිරීමට පියවර ගෙන ඇත.

කහ උණ ආසාදනය වන්නේ ආසාදිත මදුරු දෂ්ටනයෙන් මිනිසා වෙත සම්ප්‍රේෂණය කෙරෙන වෛරසයක් මගින්ය.

කෙසේ නමුත් එන්නත්කරණයෙන් මෙම කහ උණ ආසාදනයවීම වළක්වා ගැනීමේ හැකියාව ඇත.

ඒ අනුව පාස්කු නිවාඩුවට පෙර එන්නත්කරණයට ලක්වන ලෙසට එරට බලධාරීන් ජනතාවට උපදෙස් ලබා දී තිබේ.

කහ උණ රෝග ලක්ෂණ අනෙකුත් උණ රෝගී තත්ත්වයන්ට බොහෝ සෙයින් සමාන වීම හේතුවෙන් කහ උණ ආසාදිතයෙකු හඳුනා ගැනීම තරමක් අසීරු වේ.

ලෝක සෞඛ්‍ය සංවිධානයට අනුව කහ උණ ආසාදිතයින් බහුතරයක් එහි පළමු අදියරයේ දී ඉන් සුවය ලබයි.

කෙසේ වුවද සියයට 15ක පමණ ආසාදිතයින් පිරිසක් උග්‍ර කහ උණ රෝගී තත්ත්වයට මුහුණ දෙන අතර, ඉන් අඩක් දින 10ත් 14ත් අතර කාලයක දී මිය යන බව ලෝක සෞඛ්‍ය සංවිධානය වැඩිදුරටත් පවසයි.

Continue Reading

විදෙස්

අමෙරිකාවේ විශ්වවිද්‍යාලයක වෙඩිතැබීමකින්  දෙනෙකු  මරුට

Published

on

By

අමෙරිකාවේ ෆ්ලෝරිඩා ප්‍රාන්ත විශ්වවිද්‍යලයේ එරට වේලාවෙන් ඊයේ (17) දහවල් සිදු වූ වෙඩිතැබිමකින් පුද්ගලයින් 02ක් මියගොස් තවත් පුද්ගලයින් 06 දෙනෙකු තුවාල ලබා තිබේ.

විදෙස් මාධ්‍ය සඳහන් කළේ, වෙඩික්කරුද පොලිස් වෙඩිපහරකින් තුවාල ලබා රෝහල් ගතකර ඇති බවය.

වෙඩිතැබීමට යොදාගත් ගිනිඅවියද පොලීසිය විසින් සොයාගෙන ඇති අතර, සැකකරුද එම විශ්වවිද්‍යාලයේ සිසුවෙකු බවට සැකකරන බව විදෙස් මාධ්‍ය වාර්තා කරයි.

අදාළ සිද්ධියෙන් පසු එම විශ්වවිද්‍යාලය තාවකාලිකව වසාදැමීමට බලධාරින් පියවරගෙන තිබේ.

වෙඩිතැබීම සම්බන්ධයෙන් විමර්ශන සිදුකරන පොලීසිය සඳහන් කරන්නේ, එම විශ්වවිද්‍යාලයේම සේවය කරන පොලිස් නිලධාරිනියකගේ පුත්‍රයෙකු විසින් මෙම වෙඩිතැබීම සිදුකර ඇති බවය.

ඔහු ඒ සඳහා සිය මවගේ පැරණි තුවක්කුවක් යොදාගෙන ඇති බව සඳහන්ය.

කෙසේ නමුත් සැකකරුගේ වෙඩිතැබීමට හේතුව මෙතෙක් අනාවරණය වී නැත.

Continue Reading
Advertisement

Trending

Copyright © 2023 Sri Lanka Mirror. All Rights Reserved