පතරොම් තුවක්කුවකින් එල්ල කරන ලද වෙඩි ප්‍රහාරයකින් අග්බෝ හස්තියා යළි තුවාල ලබා ඇතැයි වනජීවී දෙපාර්තමේන්තුව සඳහන් කරයි.
තිරප්පනේ, වන්නම්මඩුව වැව ඉස්මත්තේ සිටි එම හස්තියාට මෙයට දින කීපයකට පෙර කිසියම් පුද්ගලයකු විසින් වෙඩි තබන්නට ඇතැයි සැක පහළ කරන බව වනජීවී දෙපාර්තමේන්තුවේ සෞඛ්‍ය අධ්‍යක්ෂ පශු වෛද්‍ය තාරක ප්‍රසාද් මහතා කීය.
අග්බෝ හස්තියාගේ උදර ප්‍රදේශයට මෙම වෙඩි පහර වැදී ඇති බවත් උණ්ඩ කීපයක් වැදී සිදුවූ එම තුවාල ගැඹුරු මාරාන්තික තුවාල නොවන බවත් වෛද්‍ය තාරක ප්‍රසාද් මහතා ‘දිනමිණ‘ කළ විමසුමකදී පැවැසීය.
මේ වන විට අනුරාධපුර වනජීවී කලාප භාර පශු වෛද්‍ය චන්දන ජයසිංහ සහ වෛද්‍ය මධුවන්ති විසින් අග්බෝ හස්තියාට අවශ්‍ය ප්‍රතිකාර සිදු කරන බවද ඒ මහතා වැඩිදුරටත් ප්‍රකාශ කළේය.
බඳින තුවක්කුවක් ක්‍රියාත්මකවීම හේතුවෙන් තුවාල ලබා දීර්ඝ කාලයක් ප්‍රතිකාර ලබමින් සිටින අග්බෝ හස්තියා මේ වන විට කිලෝමීටර 10ක පමණ දුරක් පහසුවෙන් ඇවිද යන බවත් ඒ අතර අග්බෝ, ගමට පැමිණීමටද පටන් ගෙන ඇති බවත් ඒ මහතා කීය.ගම්වැසියන් විසින් මෙම හස්තියාට ආහාර පාන ලබා දී ඇප උපස්ථාන කිරීම නිසා අග්බෝ ගම තුළට යාමට පුරුදු වී ඇත් බවත් එවැනි අවස්ථාවකදී එම හස්තියා මෙසේ වෙඩි ප්‍රහාරයකට ලක්වන්නට ඇති බවත් වෛද්‍ය තාරක ප්‍රසාද් මහතා පැවැසීය.
මිනිසුන්ට ඇති බිය අග්බෝ වෙතින් තුරන්වී තිබෙන බව කී වෛද්‍ය තාරක මහතා මිනිසුන්ගෙන් යම් හිරිහැරයක් වීමට ප්‍රථම මෙම හස්තියාව සුදුසු විසුම්පරාසයකට යොමු කිරීමට වනජීවී දෙපාර්තමේන්තුවේ අවධානය යොමු වී ඇති බවද අවධාරණය කළේය.
බඳින ලද තුවක්කුවක් පත්තු වීමෙන් පසුගිය ජූනි මාසයේදී අග්බෝ හස්තියාගේ පාදයකට බරපතළ තුවාල සිදුවී තිබිණි.
(දිනමිණ)
