නවීකරණය වෙමින් පවතින උතුරු දුම්රිය මාර්ගයේ මහව සිට අනුරාධපුර දක්වා දුම්රිය ස්ථාන අටක වගකීම් භාරගැනීම දුම්රිය ස්ථානාධිපතිවරුන් විසින් ප්රතික්ෂේප කර තිබේ.
ඒ අදාළ මගෙහි ආන්ත්‍රාදායක සංඥා පද්ධතියක් සවි කිරීමට එය ඉදිකරමින් පවතින ඉන්දීය සමාගම උත්සාහකරමින් සිටින බවට චෝදනා කරමිනි.
දුම්රිය ස්ථානාධිපති සංගමයේ සභාපති සුමේධ සෝමරත්න මහතා මාධ්‍යට පවසා ඇත්තේ මහව, අඹන්පොළ, සෙනෙරත්ගම, ගල්ගමුව, තඹුත්තේගම, තලාව, ශ්‍රාවස්ත්‍රිපුර, අනුරාධපුර යන දුම්රිය ස්ථානවල වගකීම් භාරගැනීම මෙසේ ප්රතික්ෂේප කර ඇති බවයි.
මහව සිට අනුරාධපුර දක්වා දුම්රිය මාර්ගයේ සංඥා පද්ධතිය දුම්රිය දෙපාර්තමේන්තුව මගින් මුළුමනින්ම ගලවා ඉවත් කර තිබෙන බවත් ඒ වෙනුවට ටෝකනයක් ලබාදෙන ආන්ත්‍රාදායක හා අකාර්යක්ෂම සංඥා පද්ධතියක් සවිකිරීමට උත්සහා කරන බවත් මෙය මගී ජීවිත මෙන්ම දුම්රිය සේවකයන්ගේද ජීවිත අනතුරේ හෙළන උත්සහයක් බවත් සුමේධ සෝමරත්න මහතා පෙන්වාදී තිබේ.
අනුරාධපුර සිට ඕමන්ත දක්වා කොටසේ ඉදිකිරීම් සාර්ථකව නිම කර ඇතත් මහව සිට අනුරාධපුර දක්වා කොටසේ සංඥා පද්ධතිය ගැන මෙතෙක් නිසි පියවරක් ගෙන නොමැති බවද ඔහු කියා සිටී.
මේ සම්බන්ධයෙන් ප්‍රවාහන අමාත්‍යාංශයේ ලේකම්වරයා සමගින් සාකච්ඡා කර සිය ස්ථාවරය ප්‍රකාශ කරන බවද ඔහු වැඩිදුරටත් මාධ්‍යට පවසා ඇත.
මහව සිට ඕමන්ත දක්වා දුම්රිය මාර්ගය නවීකරණය කිරීමේ ව්‍යාපෘතිය ඉන්දියානු සමාගමක් විසින් ආරම්භ කළේ පසුගිය වසරේදීය.
එහි පළමු අදියර ලෙස අනුරාධපුර සිට ඕමන්ත දක්වා කොටස ඉදිකර අවසන් කළ අතර මහව සිට අනුරාධපුර දක්වා කොටසේ ඉදිකිරීම් දෙවන අදියර යටතේ ආරම්භ වූයේ පසුගිය ජනවාරි මාසයේදීය.
දෙවන අදියරේ ඉදිකිරීම් අවසන් කර පසුගිය ජුනි 15 වැනිදා දුම්රිය මාර්ගය භාර දීමට ඉදිකිරීම් සමාගම පොරොන්දු වූවත් මාස එකහමාරකට වැඩි කාලයක් එම මාර්ගය භාරදීමට නොහැකි වූයේ ඉදිකිරීම් අවසන් නොවීම නිසාය.
ගල්ගමුව කාසිකොටේ ඉදිවන අලි මාරු වීම සඳහා සකස් කරන අලි බිංගියේ වැඩ කටයුතු අවසන් නොවීමත්, දුම්රිය නියාමකවරුන් දුම්රියෙන් ගල් ප්‍රවාහනය නොකොට වර්ජනය කිරීමත් වැනි හේතුන් මත ඉදිකිරීම් ප්‍රමාද වී තිබෙන බව මේ අතර වාර්තා වේ.
කෙසේ වෙතත් මේ මාසය අවසන් වීමට ප්‍රථම සියලුම නවීකරණ කටයුතු නිම කරමින් උතුරු දුම්රිය මාර්ගය යළි විවෘත කිරීමට සැලැසුම් කර ඇතැයි ද පැවසේ.
