කටුනායක ගුවන්තොටේ මෙහෙයුම් සාමාන්‍ය අතට

මුම්බායි සිට කොළඹ දක්වා විස්තාරා UK 131 (A321 Neo) ගුවන් යානයේ බෝම්බ බියක් වාර්තා වුවද එයින් කිසිදු තර්ජනයක් නැතැයි කටුනායක බණ්ඩාරනායක ජාත්‍යන්තර ගුවන් තොටුපළේ කළමනාකාරිත්වය පවසයි.

අද (24) කටුනායක ගුවන්තොටුපල වෙත පැය 15:15 ට පැමිණීමට නියමිතව තිබූ මුම්බායි සිට කොළඹ බලා පියාසර කරමින් තිබූ මෙම යානයෙන් වාර්තා වූ බෝම්බ බියට ප්‍රතිචාර වශයෙන් බණ්ඩාරනායක ජාත්‍යන්තර ගුවන්තොටුපලේ (BIA) කළමනාකාරීත්වය පූර්ණ හදිසි අවස්ථාවක් ප්‍රකාශයට පත් කර තිබුණි.

BIA වෙත ගොඩබෑමට පෙර ගුවන් යානයට බෝම්බ තර්ජනයක් පිළිබඳ නිශ්චිත නොවන ඇමතුමක් වාර්තා විය. ඒ අනුව, ආරක්ෂක ආයතන සහ අදාළ බලධාරීන් විසින් ප්‍රොටෝකෝලයට අනුකූලව සියලුම පූර්වාරක්ෂාව සහ වැළැක්වීමේ පියවරයන් අනුගමනය කරන ලදී. මගීන් 107 දෙනෙකු, එක් ළදරුවෙකු සහ කාර්ය මණ්ඩලය 8 දෙනෙකු සමඟ ගුවන් යානය පැය 14:55 ට ආරක්ෂිතව ගුවන් තොටුපළට ගොඩ බැස්සේය. සියලුම මගීන් ඉක්මනින් ගුවන් යානයෙන් මගී පර්යන්ත ගොඩනැගිල්ල වෙත ගෙන යන ලද අතර, සියලු මගීන්ගේ ආරක්ෂාව සහතික කරන ලදී.

ගුවන්තොටුපළ සහ ගුවන් සේවා (ශ්‍රී ලංකාව) (පුද්ගලික) ලිමිටඩ් (AASL), ආරක්ෂාව සඳහා වගකිව යුතු අනෙකුත් සියලුම බලධාරීන් සමඟ එක්ව, එවැනි සිදුවීම් සඳහා ස්ථාපිත සම්මත ප්‍රොටෝකෝල අනුගමනය කළ අතර සියලුම මගීන්ගේ සහ කාර්ය මණ්ඩලයේ ආරක්ෂාව සහ ආරක්ෂාව සහතික කර තිබුණි.

බණ්ඩාරනායක ජාත්‍යන්තර ගුවන් තොටුපළේ ගුවන් ගමන් හා සාමාන්‍ය මෙහෙයුම්, කිසිදු බාධාවකින් තොරව සාමාන්‍ය පරිදි සිදුවන බව එහි බලධාරීන් පවසයි.