තරුණයන් තිදෙනෙකු ගෙන් වරින් වර බරපතළ ලිංගික අපයෝජනයට ලක් වූ නුගේගොඩ ප්‍රසිද්ධ පාසැලක 13 හැවිරිදි දැරියක් රෝහල් ගතකර ඇතැයි කිරුලපන පොලීසිය කියයි.
සිද්ධිය සම්බන්ධයෙන් කිරුළපන ප්‍රදේශයේ පදිංචි වයස අවුරුදු 19 හා 21 තරුණයන් දෙදෙනෙකු මේ වන විට අත්අඩංගුවට ගෙන ඇතැයි වාර්තා වේ.
2022 වසරේ සැප්තැම්බර් මාසයේදී දැරිය පදිංචි නිවෙස ආසන්නයේ පැවැති අවමඟුල් උත්සවයකදී 23 හැවිරිදි තරුණයෙකු සමග පෙම් සබදතාවයක් හටගෙන තිබූ බව පොලිසිය කියයි.
අනතුරුව එම පුද්ගලයා විසින් දැරියව දෙහිවල ප්‍රදේශයේ මුහුදු වෙරළට රැගෙන ගොස් පැය කිහිපයක් ගත කිරීමෙන් අනතුරුව හෝටල් කාමරයකට රැගෙන ගොස් ලිංගික අතවර කර තිබූ බව පොලිස් විමර්ශනවලදී අනාවරණය වී ඇත.
අනතුරුව දැරිය පදිංචි නිවස ආසන්නයේ සිටින මිතුරියකගේ සහෝදරයකු වන 21 හැවිරිදි තරුණයකු දැරිය සමග සබදතාවයක් ඇති කර ගෙන තිබූ අතර දැරියගේ නිවසේ කිසිවකුත් නොමැති අවස්ථාවේදී ඔහු පැමිණ දැරියට ලිංගික අතවර කර තිබූ බව පොලිසිය කියයි.
ඉන් අනතුරුව 2023 ජනවාරි පළමුවැනි දින දැරියගේ නිවසේ පැවති සාදයකදී අධික ලෙස මත්පැන් පානය කළ 19 හැවිරිදි තරුණයකු දැරියට අතවර කර තිබූ බව සිදු කළ දීර්ඝ විමර්ශන වලදී අනාවරණයවී තිබේ
දිගින් දිගටම අතවරයට පත් දැරිය මේ පිළිබඳ ඇයගේ සමීපතම මිතුරියකට පැවසීමෙන් අනතුරුව එම යෙහෙළිය විසින් පන්ති භාර ගුරුතුමියට කරන ලද දැනුම් දැනුම්දීමක ප්‍රතිඵලයක් ලෙස 1929 උපකාරක සේවයට ලද පැමිණිල්ලක් කිරුළපන පොලිසියට යොමු කිරීමෙන් අනතුරුව දැරිය පොලිසියට ගෙන්වා කරන ලද ප්‍රශ්න කිරිමේදී මෙම අපරාධය සම්බන්ධයෙන් තොරතුරු අනාවරණයවී ඇත.
දැරියව ප්‍රථමයෙන් අතවරයට පත් කළ පුස්සැල්ලාව ප්‍රදේශයේ පදිංචි 23 හැවිරිදි තරුණයා අත්අඩංගුවට ගැනීම සඳහා විශේෂ පොලිස් කණ්ඩායමක් යොදවා ඇත.
මේ සම්බන්ධයෙන් කිරුලපන පොලිසිය වැඩිදුර පරීක්ෂණ පවත්වයි.
