ඉන්දියාවෙන් බිත්තර ආනයනය හේතුවෙන් මෙරට තුළ කුරුලු උණ ව්‍යාප්තවීමේ දැඩි අවදානමක් ඇතැයි කෘෂිකර්ම දෙපාර්තමේන්තුවේ හිටපු අධ්‍යක්ෂ කේ.බී.ගුණරත්න මහතා කියයි.
අදාළ බිත්තර තොගය ඇනවුම් කර ඇත්තේ, කුරුලු උණ ව්‍යාප්තව පවතින තමිල්නාඩු ප්‍රාන්තයෙන් බව ඔහු මාධ්‍ය වෙත පවසා තිබේ.
කුරුලු උණ ව්‍යාප්තිය හේතුවෙන් අදාළ ප්‍රදේශයේ බිත්තර මිල පහළ ගොස් ඇතැයි ද ඔහු හෙළිකර තිබේ.
මේ අතර, බිත්තර සම්බන්ධයෙන් ඉන්දියාව ලබාදිය යුතු ප්‍රමිති වාර්තාව අද ලැබෙනු ඇතැයි වෙළෙඳ හා පාරිභෝගික සුරක්ෂිතතා අමාත්‍යාංශය පවසයි.
බිත්තර ආනයනය ප්‍රමාද වී ඇත්තේ අදාළ වාර්තාව මෙතෙක් නොලැබීම හේතුවෙන් ය.
ඉන්දියාවේ සත්ත්ව හා සෞඛ්‍ය දෙපාර්තමේන්තුවෙන් එම වාර්තාව ලබාදිය යුතු වේ.
මේ අතර, ඉන්දියන් බිත්තර ආනයනය කිරීම සඳහා ආණ්ඩුවේ අයෙක් රුපියල් මිලියන 75 ක් ඉල්ලා ඇති බවට සමගි ජන බලවේගය පාර්ලිමේන්තු මන්ත්‍රි නලින් බණ්ඩාර මහතා පාර්ලිමේන්තුවේදී චෝදනා කර තිබිණි.
එසේම, වයඹ පළාතේ සුළු හා මධ්‍ය පරිමාණ කුකුළු ව්‍යාපාරිකයින් වෙළෙඳ, වාණිජ හා ආහාර සුරක්ෂිතතා අමාත්‍ය නලින් ප්‍රනාන්දු මහතා බිත්තර රටින් ගෙන්වීමට ගත් තීන්දුව සම්බන්ධයෙන් දැඩි විවේචන එල්ලකරමින් සිටී.
ඔවුන් පෙන්වා දෙන්නේ අමුද්‍රව්‍ය මිල පහළ දමා දේශීය බිත්තර නිෂ්පාදකයින් ශක්තිමත් කිරීමේ හැකියාව තිබියදී අමාත්‍යවරයා බිත්තර රටින් ගෙන්වීමට කටයුතු කර ඇති බවයි.
එසේම අමුද්‍රව්‍ය මිල පහළ දමන්නේ නම් බිත්තරයක් රුපියල් 25ක මිලකට දිය හැකි බව ඔවුන් පෙන්වාදෙයි.
මේ අතර, බිත්තර ආනයනය කිරීම පිටුපස මහා පරිමාණ බදු වංචාවක් ඇති බව සමගි ජන බලවේගයේ පාර්ලිමේන්තු මන්ත්‍රී තුෂාර ඉඳුනිල් මහතා චෝදනා කර සිටී.
කෙසේවුවද, මෙසේ තමිල් නාඩුවෙන් ගෙන්වන අදාළ බිත්තර මිලියන දෙකක ප්‍රමාණය යොදාගත හැකි වන්න්නේ බේකරි නිෂ්පාදන සඳහා පමණක් වන අතර එහි කටු පරිසරයට මුදා හැරීම ද තහනම් වේ.
සබැඳි පුවත්:
සීල් තිබ්බ බිත්තර ගබඩාව අධිකරණ නියෝගයකින් විවෘත කරයි!
නලින්ගේ බිත්තරේ රටින් එද්දී බිත්තර කුකුළු පැටව් වෙයි?
