නිල ඡන්ද දැන්වීම් පත්‍රිකා ලබන මස 02වැනි දා තැපෑලට භාර දෙන බව මැතිවරණ කොමිෂන් සභාව ප්‍රකාශ කර තිබේ.
එහි සභාපති ආර්.ඒ.එම්.එල් රත්නායක මහතා සඳහන් කළේ, ලබන මස 8 වැනිදා නිල ඡන්ද දැන්වීම් පත්‍රිකා බෙදීමේ විශේෂ දිනයක් ලෙස ප්‍රකාශයට පත් කර ඇති බවය.
ජනාධිපතිවරණය සඳහා නිල ඡන්ද දැන්වීම් පත්‍රිකා 17,140,354ක් මුද්‍රණය මේ වනවිට ආරම්භ කර ඇත.
ඡන්දය ප්‍රකාශ කිරීම සඳහා ඡන්ද මධ්‍යස්ථාන කරා යන ඡන්ද දායකයින් නිල ඡන්ද දැන්වීම් පත්‍රිකාව රැගෙන යාමෙන් සිය අන්‍යතාව තහවුරු කර ගැනීමට පහසුවක් වනු ඇත.
මේ අතර ජනාධිපතිවරණයේ නිල ඡන්ද පත්‍රිකා මුද්‍රණය ආරම්භ කර ඇති බව රජයේ මුද්‍රණාලය පවසයි.
එහි ජ්‍යේෂ්ඨ නිලධාරියෙකු පැවසුවේ, ඒ සඳහා අතිරේක පොලිස් ආරක්ෂාවක් ලබා දි ඇති බවය.
මෙවර නිල ඡන්ද පත්‍රිකාවේ දිග අගල් 28කි.
තැපැල් ඡන්ද ප්‍රකාශ කරන දිනයට පෙර එම පත්‍රිකාවල පළමු කොටස මැතිවරණ කොමිසමට භාරදීමට සැලසුම් කර ඇති බව රාජ්‍ය මුද්‍රණාලය පවසයි.
