ජාතික ඖෂධ නියාමන අධිකාරියේ ලියාපදිංචි නොකළ ඖෂධ ඉන්දියාවෙන් ආනයනය කිරීමට සෞඛ්‍ය අමාත්‍යංශය ගෙන ඇති තීරණය අත්හිටුවන ලෙස ජනාධිපති රනිල් වික්‍රමසිංහ මහතා විසින් සෞඛ්‍ය ඇමැති රමේෂ් පතිරණ මහතාට ඊයේ (29) උපදෙස් ලබා දී තිබේ.
ජනාධිපතිවරයාගේ ප්‍රතිපත්ති ප්‍රකාශනය එළිදැක්වීමෙන් පසු පැවැති මන්ත්‍රි කණ්ඩායම් රැස්වීමේදී පාර්ලිමේන්තු මන්ත්‍රි රාජිත සේනාරත්න මහතා විසින් මේ පිළිබඳ ජනාධිපතිවරයා දැනුවත් කර ඇත.
ඖෂධ ආනයනය කිරීම සඳහා ජාතික ඖෂධ නියාමන අධිකාරියේ ලියාපදිංචි සැපයුම්කරුවන් සිටියදී ඉන්දියාවේ සමාගමකින් ඖෂධ ආනයනය කිරීම තුළින් මෙරට සැපයුම්කරුවන් අධෛර්යමත් වන බව මන්ත්‍රිවරයා පෙන්වා දී තිබේ.
මේ පිළිබඳ ජනාධිපතිවරයා සෞඛ්‍ය ඇමැති රමේෂ් පතිරණ මහතාගෙන් කරුණු විමසා එම තීරණය අත්හිටුවන ලෙස දැනුම් දී ඇත.
ඊට සෞඛ්‍ය ඇමතිවරයාද එකඟත්වය පළ කර ඇති බව පැවසේ.
ඉන්දියාවෙන් ඖෂධ ආනයනය කිරීමේ තීරණයට එරෙහිව සෞඛ්‍ය වෘත්තිය සමිති ඖෂධ ආනයනකරුවන්ගේ වාණිජ මණ්ඩලය, දේශීය ඖෂධ නිෂ්පාදකයන් මෙන්ම ශ්‍රී ලංකාවේ පෙරටුගාමී පක්ෂය ද විරෝධය පළ කරමින් මාධ්‍ය හමු පැවැත්වීය.
මූලාශ්‍රය – අරුණ
