බොරැල්ල පෞද්ගලික රෝහලක සිදු වූ බවට කියන වකුගඩු ජාවාරමේ ප්‍රධාන නියෝජිතයා ලෙස කටයුතු කළ පුද්ගලයා කොළඹ ප්‍රදේශයේ දී අත්අඩංගුවට ගත් බව කොළඹ අපරාධ කොට්ඨාසය කියයි.
මෙලෙස අත්අඩංගුවට ගෙන ඇත්තේ මට්ටක්කුලිය කජිමා වත්ත ප්‍රදේශයේ පදිංචි මොහොමඩ් බසීර් මොහොමඩ් රාජාබ්ඩින් නොහොත් බායි නමැති 41 හැවිරිදි පුද්ගලයෙකි.
කොළඹ අපරාධ කොට්ඨාසයේ ඒකක 2හි ස්ථානාධිපති උප පොලිස් පරීක්ෂක ආර්. එම්. රත්නමලල මහතාට ලද තොරතුරක් අනුව පසුගිය දින කිහිපයේදී ප්‍රදේශය හැර ගොස් සිටි සැකකරු අත්අඩංගුවට ගෙන ඇත.
වකුගඩුවකට රු. කෝටි එකහමාර, ලක්ෂ 80 ආදී විවිධ මිල ගණන් ලබා දෙන බව පවසා කොළඹ 14 සහ 15 ප්‍රදේශ වල පදිංචි දිළිඳු පවුල්වල පුද්ගලයන් සිවුදෙනෙකු සහ කාන්තාවකගෙන් වකුගඩු ලබාගෙන රු. 250,000ක් වැනි සුළු මුදලක් ලබාදී මෙම ජාවාරම සිදුකරගෙන ගොස් ඇති බව පොලිසිය කියයි.
