ශ්‍රී ලංකා උත්තේජක මර්ධන නියෝජිත ආයතනය මගින් සිදුකල තහනම් උත්තේජක පරීක්ෂණයකදී හිටපු දැල්පන්දු නායිකාවක් තහනම් උත්තේජක ලබාගත් බවට තහවුරු වී ඇතැයි වාර්තා වේ.

ටොරින්ටන් ශරීර සුවතා මධ්‍යස්ථානයේදී ජාතික දැල්පන්දු ක්‍රීඩිකාවන් ඉලක්ක කර සිදුකළ තහනම් උත්තේජක පරීක්ෂණයකදී මේ බව හෙළිව තිබේ.

එහිදි ක්‍රීඩිකාවන් දෙදෙනෙකු අහඹු ලෙස මෙම පරීක්ෂණයකට යොමුකර එක් ක්‍රීඩිකාවක් මාංශ පේශීන් වර්ධනයට සිදුකරනු ලබන ඇනබොලික් ස්ටොරයිඩ් නම් වූ තහනම් උත්තේජකය ලබා ගෙන ඇති බවට තහවුරුවී ඇතැයි පැවසේ.

මෙය ටෙස්ටෙස්ටරෝන් හෝමෝනයට සමාන මිනිසා විසින් නිෂ්පාදිත කෘතිම ස්ටොරයිඩටයක් ලෙස සැලැකේ.

අදාල පරීක්ෂණවල ප්‍රතිපළ ඊයේ (08) උදෑසන කටාර්හී පිහිටි උත්තේජක පාලන රසායනාගාරය විසින් නිකුත් කර ඇති අතර, එහිදි හිටපු නායිකාවගේ සාම්පලවල මෙම තහනම් උත්තේජකයේ සංගටක පැවති බව තහවුරු වී ඇත.

මේ අතර, ශ්‍රී ලංකා උත්තේජක මර්ධන ඒකකයේ ප්‍රධානී වෛද්‍ය ශිරෝමි පිලපිටිය මහත්මිය මාධ්‍යට පවසා ඇත්තේ මේ සම්බන්ධයෙන් විමර්ශණයක් සිදුකරනු ලබන බවත්, එසේම අද (09) දිනයේ ප්‍රකාශයක් නිකුත් කිරීමට කටයුතු සූදානම් කරන බවයි.

එමෙන්ම මේ සම්බන්ධව සිදුකරන පරීක්ෂණයේදී අදාල ක්‍රීඩිකාව වැරදිකරු වුවහොත් වසරක සිට වසර 4ක් දක්වා දැල් පන්දු ක්‍රීඩාව හා ඊට සම්බන්ධ කිසිදු කටයුත්තක් සිදු කල නොහැකි ආකාරයේ තහනමක් පැනවෙනු ඇති බවත් පැවසේ.

රාජ්‍ය ඇමැතිනී ඩයනා ගමගේ සම්බන්ධයෙන් ශ්‍රේෂ්ඨාධිකරණය දුන් තීන්දුව  නිසා මෙරට පුරවැසියෙක් නොවන තැනැත්තකුට දේශපාලන පක්ෂයක් ලියාපදිංචි කළ නොහැකි බව දක්වමින් සමගි ජන බල‍වේගයට එරෙහිව ශ්‍රේෂ්ඨාධිකරණයේ නඩුවක් පැවරීමට ආණ්ඩුපක්ෂයේ පිරිසක් උත්සාහ කරමින් සිටින බවට වාර්තා පැතිර තිබේ.

මේ අතර, විදුලිබල හා බලශක්ති ඇමැති කංචන විජේසේකර මහතා ඊයේ (08) පාර්ලිමේන්තුවේ දී මේ  පිළිබඳ අදහස් දක්වමින් මෙරට පුරවැසියෙක් නොවන තැනැත්තකුට දේශපාලන පක්ෂයක් ලියාපදිංචි කළ නොහැකි බවද කියා සිටියේය.

ඔහු වැඩිදුරටත් එහිදී මෙසේද කීය.
“ඩයනා ගමගේ මහත්මියගේ පාර්ලිමේන්තු මන්ත්‍රී ධුරය අහෝසි වන බවට අද ශ්‍රේෂ්ඨාධිකරණයෙන් තීන්දුවක් දුන්නා. සමඟි ජන බලවේගය පක්ෂය ලියාපදිංචි කර තිබෙන්නෙ එතුමිය. එතකොට ඒ පක්ෂය තියෙන්නේ එතුමියගෙ නමින්. පුරවැසියෙක් නොවෙන අයෙක්ට පක්ෂයක් ලියාපදිංචි කරන්න බැහැ. මේ විවාදයට වඩා සමගි ජන බලවේගය මේ ප්‍රශ්නයට මුහුණ දෙන්න සැලසුම් කරන්න. දැන්මම හොඳම නීතිඥ කණ්ඩායමක් අල්ලා ගන්න. හැබැයි අපේ පැත්තේ ඉඳලා ඔය පැත්තට ඇවිත් තිබෙන නීතිඥවරුන්ගෙන් නම් උපදෙස් ගන්න එපා. ගත්තොත් මොනවා වෙයි ද දන්නේ නැහැ.”

මැදවච්චිය පොලිසියේ දූෂණ මර්දන අංශයේ ස්ථානාධිපතිවරයා මේ මස 15 වැනි දින දක්වා රිමාන්ඩ් බන්ධනාගාර ගත කරන ලෙස මැදවච්චිය මහෙස්ත්‍රාත් නිමේෂා ධර්මදාස මෙනවිය ඊයේ (08) නියෝග කළාය.

ඒ රථ වාහන පරීක්ෂාවකදී ලොරි රථයක රියැදුරා ලෙස කටයුතු කළ තරුණයකුට පහරදී බරපතළ තුවාල සිදු කර පසුව සිදු කළ ශල්‍ය කර්මයකින් ඔහුගේ වෘෂණ කෝෂයක් ඉවත් කිරීමට සිදවීමේ සිද්ධියක් සම්බන්ධයෙන් අපරාධ පරීක්ෂණ දෙපාර්තම‍ෙන්තුව මගින් අදාළ ස්ථානාධිපතිවරයා අත්අඩංගුවට ගෙන අධිකරණය හමුවට ඉදිරිපත් කිරීමෙන් පසුවය.

සැකකාර ස්ථානාධිපතිවරයා එදිනට හඳුනා ගැනීමේ පෙරෙට්ටුවකට ඉදිරිපත් කරන ලෙසටද මහෙස්ත්‍රාත්වරිය අනුරාධපුර බන්ධනාගාර අධිකාරිවරයාට තවදුරටත් නියෝග කරනු ලැබුවාය.

සැකකාර දූෂණ මර්දන අංශ ස්ථානාධිපතිවරයාගේ හඳුනා ගැනීමේ පෙරෙට්ටුව අවලංගු කරන ලෙස ඔහු වෙනුවෙන් පෙනී සිටි ජ්‍යෙෂ්ඨ නීතිඥ සජීව ගුණරත්න කළ ඉල්ලීම මහෙස්ත්‍රාත්වරිය තරයේ ප්‍රතික්ෂේප කරමින් මෙම නියෝගය සිදු කළාය.

මේ අතර මෙම සිද්ධිය සම්බන්ධයෙන් දැනට රිමාන්ඩ් කර සිටින මැදවච්චිය පොලිසියේ රථ වාහන අංශයේ සේවය කළ පොලිස් සැරයන්වරු දෙදෙනා ඇප මත මුදා හරින ලෙස ඔවුන් වෙනුවෙන් පෙනී සිටි නීතිඥ භාග්‍ය ශ්‍රී හේරත් අධිකරණයෙන් කළ ඉල්ලීම ද ප්‍රතික්ෂේප කළ මහෙස්ත්‍රාත්වරිය සැකකරුවන් මේ මස 15 දින දක්වා යළි රිමන්ඩ් කරන ලෙසට නියෝග කළාය.

මෙහිදී අපරාධ පරීක්ෂණ දෙපාර්තමේන්තුව වැඩිදුර වාර්තාවක් අධිකරණයට ඉදිරිපත් කරමින් පැවසුවේ මෙම සිද්ධියට සම්බන්ධ බවට සැක කෙරෙන තවත් පොලිස් නිලධාරීන් තිදෙනකු අත්අඩංගුවට ගැනීමට සිටින බවයි. 

සැකකාර පොලිස් නිලධාරීන් තිදෙනා මේ වන විට පදවිය සහ කැබිතිගොල්ලෑව පොලිස් ස්ථානවල සේවය කරමින් සිටින බවත් ඔවුන් අපරාධ පරීක්ෂණ දෙපාර්තමේන්තුවට බාර දෙන ලෙස එම පොලිස් ස්ථානවල ස්ථානාධිපතිවරුන්ට දන්වා ඇතත් මෙතෙක් එය ක්‍රියාත්මක නොවූ බවත් අපරාධ පරීක්ෂණ දෙපාර්තමේන්තුව පවසයි.

පැමිණිල්ල වෙනුවෙන් අපරාධ පරීක්ෂණ දෙපාර්තමේන්තුව භාර නියෝජ්‍ය පොලිස්පති රෝහණ ප්‍රේමරත්න මහතාගේ උපදෙස් මත එම දෙපාර්තමේන්තුවේ නිලධාරීන් පෙනී සිටි අතර පළමු සහ දෙවන සැකකාර පොලිස් සැරයන්වරුන් වෙනුවෙන් නීතිඥ භාග්‍ය ශ්‍රී හේරත් මහතා සහ තුන් වන සැකකාර මැදවච්චිය පොලිසියේ දූෂණ මර්දන අංශයේ ස්ථානාධිපතිවරයා වෙනුවෙන් ජ්‍යෙෂ්ඨ නීතිඥ සජීව ගුණරත්න මහතා පෙනී සිටියහ.

නිරීක්ෂණ පාර්ශ්වයක් ලෙස ශ්‍රී ලංකා නීතිඥ සංගමය වෙනුවෙන් එම සංගමයේ සභාපති ජනාධිපති නීතිඥ කෞෂල්‍ය නවරත්න සහ උප සභාපති ජනාධිපති නීතිඥ නලින්ද ඉන්ද්‍රතිස්ස යන මහත්වරුන්ගේ උපදෙස් මත ශ්‍රී ලංකා නීතිඥ සංගමයේ අනුරාධපුර ශාඛාවේ උප සභාපති නීතිඥ චතුර ධනංජය රණතුංග සමග නීතිඥ සඳුනි ජයතිලක‍ පෙනී සිටි අතර අගතියට පත් පාර්ශ්වයේ අයිතිවාසිකම් වෙනුවෙන් ජ්‍යෙෂ්ඨ නීතිඥ අරවින්ද හබක්කල සමග නීතිඥ දනුෂ්කා දන්තනාරායන පෙනී සිටියහ.