ලංකා ප්‍රිමියර් ලීග් තරගාවලිය සඳහා සහභාගී වීමට නියමිත කණ්ඩායමක් වනDambulla Thunders කණ්ඩායම හා සම්බන්ධ තමීම් රහමාන් නම් පුද්ගලයාව ලබන 31 වනදා තෙක් රක්ෂිත බන්ධනාගාරගත කර තිබේ.
සැකකරුව කොළඹ මහෙස්ත්‍රාත් අධිකරණය වෙත ඉදිරිපත් කෙරුණු අතර එහිදී මෙම නියෝගය නිකුත් කෙරුණි.
Dambulla Thunders කණ්ඩායම හා සම්බන්ධ තමීම් රහමාන් නම් පුද්ගලයෙක් ව කටුනායක ගුවන්තොටුපොළේ දී ආගමන විගමන නිලධාරීන් විසින් රඳවා ගෙන තිබූ අතර ක්‍රීඩාවලට සම්බන්ධ වැරදි වැළැක්වීමේ විශේෂ විමර්ශන ඒකකය විසින් විමර්ශන කරනු ලබන නඩු කටයුත්තක් මත විදෙස් ගමන් තහනමක් පනවා තිබීම හේතුවෙන් ඔහුව රඳවා ගත් බව වාර්තා විය.
අනතුරුව, “තරග පාවාදීමට යෝජනා කිරීමට උත්සාහ කිරීම” සම්බන්ධයෙන් ක්‍රීඩා දූෂණ විමර්ශන අංශය විසින් සැකපිට අත් අඩංගුවට ගත් අදාළ සැකකරු අධිකරණයට ඉදිරිපත් කර තිබුණි.
සැකකරු කොළඹ මහෙස්ත්‍රාත් අධිකරණය වෙත ඉදිරිපත් කිරීමෙන් අනතුරුව මැයි 31 දක්වා රක්ෂිත බන්ධනාගාරගත කරන ලෙස නියෝග කෙරිණි.
