මෙරට ක්‍රීඩාංගණ දෙකක භූමි කාර්යමණ්ඩල වෙත ආසියානු කුසලාන ක්‍රිකට් තරගාවලිය අතරතුරදී පොරොන්දු වූ ඇමෙරිකානු ඩොලර් 50,000ක (රු. මිලියන 16ක් පමණ) වටිනා ත්‍යාග මුදල් බෙදාදීම ආරම්භ කළ බව ශ්‍රී ලංකා ක්‍රිකට් ආයතනය දැනුම් දෙයි.
මේ සඳහා ආසියානු ක්‍රිකට් කවුන්සිලයෙන් හා ශ්‍රී ලංකා ක්‍රිකට් ආයතනයෙන් ඩොලර් 25,000 බැගින් සම දායකත්වයක් ලබාදී තිබේ.
ශ්‍රී ලංකා ක්‍රිකට් විසින් නිකුත් කළ නිවේදනයක දැක්වෙන්නේ කොළඹ ආර්.ප්‍රේමදාස ක්‍රීඩාංගණයේ කාර්යමණ්ඩලයට සහ පල්ලෙකැලේ ක්‍රීඩාංගණයේ කාර්යමණ්ඩලයට මෙම ත්‍යාග මුදල් හිමිවන බවයි.
මෙමගින් කොළඹ ආර්.ප්‍රේමදාස පිටියේ භූමි කාර්යමණ්ඩලයේ 138කට මුදල් ලබාදී ඇති අතර පල්ලෙකැලේ ක්‍රීඩාංගණයේ භූමි කාර්යමණ්ඩලයේ 115කට එළැඹෙන සිකුරාදා ත්‍යාග මුදල් ලබාදීමට නියමිතව ඇත.
