විස්සයි විස්ස කණ්ඩායමේ නව නායකයා ලෙස චරිත් අසංලක පත් කිරීමට ශ්රී ලංකා ක්රිකට් තේරීම් කමිටුව තීරණය කර ඇතැයි වාර්තා වේ.
මේ බව ඔහුට පසුගිය සිකුරාදා නිල වශයෙන් දැනුම් දී ඇති බව, ‘ද සන්ඩේ ටයිම්ස්’ පුවත් පත වාර්තා කර ඇත.
ඒ අනුව චරිත් අසලංක ඉන්දියාව සමඟ ඉදිරියේ දී පැවැත්වීමට නියමිත විස්සයි විස්ස තරගාවලියේ සිට ශ්රී ලංකා විස්සයි විස්ස ක්රිකට් කණ්ඩායමේ නිත්ය නායකයා ලෙස කටයුතු කරනු ඇතැයි පැවසේ.
වනිඳු හසරංග නායකත්වයෙන් ඉල්ලා අස්වීමට කටයුතු කිරීමත් සමඟ අදාළ පත් කිරීම සිදු කිරීමට කටයුතු කර ඇති බව වාර්තා වේ.
වනිඳු ශ්රී ලංකා විස්සයි විස්ස ක්රිකට් කණ්ඩායමේ නායකයා ලෙස මාස හයකට ආසන්න කාලයක් කටයුතු කළ අතර එම කාලයේ දී ඔහුගේ හැසිරීම සහ නායකත්වය සම්බන්ධයෙන් දැඩි විවේචන ඔහුට සමාජ මාධ්ය හා මාධ්ය හරහා එල්ලවී තිබිණි.
පසුගිය සිකුරාදා චරිත් අසලංක සහ තේරීම් කමිටුවේ සාමාජිකයන් අතර පැවැති සාකච්ඡාවේ දී ඉදිරි තරගාවලිය සඳහා ක්රීඩා කරන කණ්ඩායම් සංයෝජනය සම්බන්ධයෙන් සාකච්ඡා කර ඇති බව ද පැවසේ.
ශ්රී ලංකාව සහ ඉන්දියාව අතර පැවැත්වෙන විස්සයි විස්ස ක්රිකට් තරගාවලිය ලබන 27 වැනිදා නුවර පල්ලේකැලේ ජාත්යන්තර ක්රිකට් ක්රීඩාංගණයේ දී ආරම්භ වීමට නියමිතය.
