මේ දිනවල පැවැත්වෙන ඉන්දීය ප්‍රිමියර් ලීග් (IPL) ක්‍රිකට් තරගාවලිය අතරතුර දී ආබාධයකට ලක් වූ ගුජරාට් ටයිටන්ස් ක්‍රීඩක ග්ලෙන් පිලිප්ස් වෙනුවට තුන්ඉරියව් ක්‍රීඩක දසුන් ශානකට හදිසි කැඳවීමක් ලැබී ඇත.

ඒ අනුව ෂුබ්මන් ගිල් නායකත්වය දරන ගුජරාට් ටයිටන්ස් විසින් ශානකව ඉන්දීය රුපියල් ලක්ෂ 75කට (මෙරට රු.කෝ. 2.5කට වැඩි) මිලදී ගෙන ඇත.

කෙසේ නමුත් ශානකට ටයිටන්ස් කණ්ඩායම අලුත් අත්දැකීමක් නොවන අතර, ඔහු මීට පෙර 2023 වසරේදී එවක නායකත්වය දැරූ හාර්ඩික් පාන්ද්‍යා යටතේ ද මෙම කණ්ඩායම වෙනුවෙන් ක්‍රීඩාකර ඇත.

එහිදී පසුපෙළ පිතිකරුවෙකු ලෙස පන්දුවට පහරදී එම තරග තුනේදී ශානක ලකුණු 26ක් ලබාගත්තේය.

කෙසේ නමුත් එහිදී පන්දු යැවීමට ඔහුට අවස්ථාවක් නොලැබුණි.

ශ්‍රී ලංකාව වෙනුවෙන් විස්සයි20 තරග 102කට ක්‍රීඩාකර ඇති ශානක පන්දුවට පහරදීමෙන් ලකුණු 1456ක් ලබාගෙන ඇති අතර, ඊට අර්ධ ශතක 5ක් ඇතුළත්ව ඇත.

ඔහුගේ ප්‍රහාරාත්මක වේගය 122.46ක් ලෙස සටහන්වී තිබේ.

එමෙන්ම පන්දු යැවීමෙන්ද දක්ෂතා දක්වා ඇති ඔහු විස්සයි20 ජාත්‍යන්තර කඩුලු 33කට හිමිකම් කියයි.

හයිද්‍රාබාද්හිදී පැවති සන්රයිසස් හයිද්‍රාබාද් කණ්ඩායමට එරෙහි තරගයේදී ග්ලෙන් පිලිප්ස් ආබාධයකට ලක්විය.

ඒ හේතුවෙන් ඔහුව තරගාවලියේ ඉතිරි තරගවලින් ඉවත් කරන ලදී.

මේ වනවිට පිලිප්ස් යළි නවසීලන්තය බලා පිටත්ව ගොස් ඇත.

ඔලිම්පික් තරග සඳහා ක්‍රිකට් ක්‍රීඩාව ඇතුළත් කිරීමට ජාත්‍යන්තර ඔලිම්පික් කමිටුවේ විධායක කමිටුව තීරණය කර තිබේ.

2028 ලොස් ඇන්ජලිස් නුවර පැවැත්වෙන ඔලිම්පික් උළෙලට ක්‍රිකට් ක්‍රීඩාව ඇතුළත් කර ඇති අතර එම තරග දකුණු කැළිෆෝනියාවේදී පැවැත්වීමට ජාත්‍යන්තර ඔලිම්පික් කමිටුවේ විධායක කමිටුව තීරණය කර ඇත.

පන්දුවාර විස්සේ තරගාවලියක් ලෙස එය පැවැත්වෙන බව සඳහන්ය.

කාන්තා සහ පිරිමි කණ්ඩායම් 6ක් බැගින් එය පැවැත්වෙනු ඇත.

ඔලිම්පික් ක්‍රිකට් ක්‍රීඩාංගනය ලෙස දකුණු කැලිෆෝනියාවේ පොමෝනාහි ෆෙයාර්ග්‍රවුන්ඩ්ස් ප්‍රකාශයට පත් කිරීමේ යෝජනාව ජාත්‍යන්තර ක්‍රිකට් කවුන්සිලයද පිළිගෙන තිබේ.

සෞදි අරාබියේ පැවැත්වෙන වයස අවුරුදු 18න් පහළ ආසියානු යොවුන් මළල ක්‍රීඩා ශූරතාවලියේදී ශ්‍රී ලංකාවට තවත් ජාත්‍යන්තර පදක්කම් දෙකක් දිනා ගැනීමට සමත්ව තිබේ.

ඒ, මීටර් 100 බාලිකා ධාවය ඉසව්වෙන් හා මීටර 1,500 තරග ඉසව්වෙනි.

මීටර් 100 බාලක ධාවන ඉසව්වෙන් ධනංජනා සෙව්මිණී ප්‍රනාන්දු එම තරගය තත්පර 11:9:2 කින් නිමාකරමින් එම ඉසව්වේ රිදී පදක්කමද, මීටර 1,500 තරග ඉසව්වෙන් ළහිරු අචින්ත ලෝකඩ පදක්කමක්ද දිනා ගැනීමට සමත්ව ඇත.

ඔහුගේ තරඟ නිමි කාලය විනාඩි 3යි තත්පර 59යි දශම 47කි. 

වයස අවුරුදු 18න් පහළ ආසියානු යොවුන් මළල ක්‍රීඩා ශූරතාවලිය සෞදි අරාබියේදි මෙවර පැවැත්වෙන්නේ 06 වැනි වරට වන අතර එම මළල ක්‍රීඩා තරඟාවලිය ආරම්භ වූයේ ඉකුත් 15 වැනිදාය.