මනිපූර් ප්‍රාන්තයේ, වාර්ගික ගැටුම් උත්සන්න වීමත් සමඟ, ඉන්දීය අග්‍රාමාත්‍ය නරේන්ද්‍ර මෝදි ප්‍රමුඛ රජයට එරෙහිව, එරට පාර්ලිමේන්තුවට (ලෝක් සභාවට) විශ්වාසභංගයක් ගෙන ඒමට ඉන්දීය විපක්ෂ දේශපාලන කණ්ඩායම් සූදානම් වෙයි.
මනිපූර් ප්‍රාන්තයේ බලයේ සිටින්නේ මෝදිගේ භාරතීය ජනතා පක්ෂය වන අතර, පසුගිය මැයි මාසයේ දී එහි ඇරඹුනු වාර්ගික ගැටුම් වලින් මේ වනවිට 130 දෙනකු මියගොස් ඇති අතර, 60,000කට උන්හිටිතැන් අහිමි වී ඇතැයි විදෙස් වාර්තා සඳහන් කරයි.
ආසන 542 ක් සහිත ඉන්දීය පාර්ලිමේන්තුවේ අග්‍රාමාත්‍ය නරේන්ද්‍ර මෝදි ප්‍රමුඛ භාරතීය ජනතා පක්ෂයට හිමි ආසන 301 කි. ඒ අනුව, විපක්ෂ දේශපාලන කණ්ඩායම් සන්ධානගතවී විශ්වාසභංගයක් ඉදිරිපත් කළද, එය පරාජය කිරීමේ හැකියාව පවතින්නේ භාරතීය ජනතා පක්ෂය සතුවයි.
