තමාව ඝාතනය කිරීමට සැලසුමක් ඇති බවට දැන සිටි බව පාකිස්තානයේ හිටපු අගමැති ඉම්රාන් ඛාන් ඊයේ (04) දින හෙළිදරව් කර තිබේ.
ඔහු මේ බව පවසා ඇත්තේ ප්‍රතිකාර ලබමින් සිටින Shaukat Khanum රෝහලේ දී සිය ආධාරකරුවන් අමතමිනි.
“වසිරාබාද් සහ ගුජරාත් අතර කොතැනකදී හෝ මාව මරා දැමීමේ සැලසුමක් ඇතැයි මා දැනගෙන සිටියා,”යැයි ඔහු පවසා තිබේ.
මේ අතර, මෙම ඝාතන උත්සහය පසුපස එරට අගමැති ෂෙබාස් ෂරීෆ්, අභ්‍යන්තර කටයුතු අමාත්‍ය – රානා සනාඋල්ලා සහ පාකිස්තාන හමුදාවේ මේජර්වරයකු සිටින බවට ඛාන් මහතා නගා ඇති චෝදනා “පදනම් විරහිත” බව පවසමින් එරට හමුදාව විසින් ප්‍රතික්ෂේප කර ඇත.
තවද, ඛාන් මහතාගේ PTI පක්ෂයේ ලාහෝර් අංශයේ ලේකම් සුබායිර් නියාසි මහතා පවසා ඇත්තේ මෙම සිද්ධිය සම්බන්ධයෙන් ගොනු කළ පැමිණිල්ලක් පොලිසිය විසින් භාරගෙන නැති බවයි.
මාධ්‍ය වැඩසටහනකදී අදහස් දක්වමින් ඔහු පවසා ඇත්තේ තමා FIR පැමිණිල්ලක් ගොනුකිරීමට වසිරාබාද් පොලිස් ස්ථානයට ගිය බවත්, එම පැමිණිල්ලේ ඡායාරූපයක් දිස්ත්‍රික් පොලිස් නිලධාරියා වෙත යැවූ නමුත් නිල වශයෙන් පැමිණිල්ලක් ගොනු නොකළ බවත්ය.
මේ වන විට ප්‍රහාරය පිළිබඳ විමර්ශනය පාකිස්තානයේ ත්‍රස්ත මර්දන දෙපාර්තමේන්තුව විසින් භාරගෙන ඇති අතර, සිද්ධියේ ප්‍රධාන සැකකරුව ප්‍රශ්ණ කරමින් සිටියි.
බ්‍රහස්පතින්දා දිනයේ එල්ල වූ මෙම ප්‍රහාරයෙන් එක් පුද්ගලයෙකු මියගොස් ඇති අතර, තවත් 13 දෙනෙකු තුවාල තිබේ.
තවද, ඛාන් මහතා සුවය ලබන තෙක් ‘Haqeeqi Azadi March’ නතර කිරීමට තීරණය කර තිබේ.
(මූලාශ්‍රය : Geo News)
