ඉදිරි ජනාධිපතිවරණ අපේක්ෂකත්වය සම්බන්ධයෙන් ජනාධිපති රනිල් වික්‍රමසිංහ මහතා සමග මෙතෙක් කිසිදු එකඟතාවක් ඇතිකර නොගත් බව ශ්‍රී ලංකා පොදුජන පෙරමුණ පවසයි.
ඒ සම්බන්ධයෙන් පක්ෂය සමග වෙනම සාකච්ඡා කරන්නැයි ඉල්ලා සිටිය ද ජනාධිපතිවරයා මෙතෙක් ඒ සඳහා දිනයක් ලබා දී නොමැති බවද ශ්‍රී ලංකා පොදුජන පෙරමුණේ මහ ලේකම් පාර්ලිමේන්තු මන්ත්‍රී සාගර කාරියවසම් මහතා කියා සිටී.
ඉදිරි ජනාධිපතිවරණයේදී ශ්‍රී ලංකා පොදුජන පෙරමුණේ සහය ලබා දෙන්නේ කා හටද යන්න සම්බන්ධයෙන් එම පක්ෂය මෙතෙක් තීරණයක් ගෙන නොමැති බවද ඔහු සඳහන් කරයි.
සාගර කාරියවසම් මහතා ප්‍රකාශ කළේ, තම කොන්දේසිවලට එකඟ වන තැනැත්තෙකුට ජනාධිපතිවරණයේදී සහය ලබාදීම සම්බන්ධයෙන් අවධානය යොමුවී ඇති බවයි.
මේ අතර, දින කිහිපයකට පෙර ජනතිවරයා සමග තනිව සාකච්ඡාවක් පැවැත්වීමට යැයි කියමින් එම පක්ෂයේ ප්‍රධානීන් කිහිප දෙනෙකු අමාත්‍ය ප්‍රසන්න රණතුංග මහතා විසින් සියලු පක්ෂ සාමාජිකයන් සහභාගිවන රැස්වීමකට සහභාගි කිරීම සම්බන්ධයෙන්ද මේවන විට පොහොට්ටු පක්ෂය අභ්‍යන්තරයේ ගැටුමක් මතුව ඇතැයි වාර්තා වේ.
එම රැස්වීමට ප්‍රසන්න පිරිස අරගෙන ගොස් ඇත්තේ පොහොට්ටු පක්ෂ නිර්මාතෘ බැසිල් රාජපක්ෂ මහතාට දුරකථනයෙන් කතාකර සෘජු අවසරයක් ලබාගෙන බවද පැවසේ.
මේ රැස්වීමට පක්ෂයේ ජ්‍යෙෂ්ඨ නියෝජිත පිරිසක් රැගෙන යන ලෙස බැසිල් මහතා පක්ෂයේ මහලේකම් සාගර කාරියවසම් මහතාට ලබාදුන් උපදෙස් අනුව පවිත්‍රා වන්නිආරච්චි, ජොන්ස්ටන් ප්‍රනාන්දු, රෝහිත අබේගුණවර්ධන, එස්.එම්. චන්ද්‍රසේන, සංජීව එදිරිමාන්න ඇතුළු පිරිසක් සමඟ කාරියවසම් මහතා මේ රැස්වීමට සහභාගිවී ඇත.
කෙසේවුවද, ප්‍රසන්න මෙය ජනපති හා පොහොට්ටු පක්ෂය අතර සාකච්ඡාවක් බව පැවසුවද පැජන්ට් පාරේ ජනපතිවරයාගේ පෞද්ගලික නිවසේ පැවැති මේ සාකච්ඡාවට අග්‍රාමාත්‍ය දිනේෂ් ගුණවර්ධන මහජන එක්සත් පෙරමුණේ නායකයා ලෙස මෙහි පැමිණ සිට ඇති අතර, නව සන්ධානය වෙනුවෙන් නිමල් ලංසා, අනුර ප්‍රියදර්ශන යාපා, නලින් ප්‍රනාන්දු යන අයට ද ආණ්ඩුවේ හවුල්කාරයන් වන මහින්ද අමරවීර, නිමල් සිරිපාල ද සිල්වා, දුමින්ද දිසානායක යන පිරිස මෙන්ම ටිරාන් අලස් මහතා ද එහි දිටි බව පැවසේ.
එසේම ජනපති උපදේශක සාගල රත්නායක මෙහි වූ බව වාර්තා වේ.
