නෙස්ලේ ආයතනය විසින් නිෂ්පාදනය කර බෙදාහරින ළදරු කිරි සහ ධාන්‍ය නිෂ්පාදන වන Nido හා Cerelac යන නිෂ්පාදන ප්‍රමිතියට තිබේදැයි සොයා බලන ලෙස ඉල්ලා ඉදිරි සතියේදී ශ්‍රී ලංකා ප්‍රමිති ආයතනයට පැමිණිලි කරන බව ජාතික පාරිභෝගික පෙරමුණ කියා සිටී.

ලොව විශාලතම පාරිභෝගික භාණ්ඩ සමාගමක් වන නෙස්ලේ, තරබාරුකම සහ නිදන්ගත රෝග වැළැක්වීමේ අන්තර්ජාතික මාර්ගෝපදේශයන්ට පටහැනිව යමින් බොහෝ දුප්පත් රටවල අලෙවි කරන ළදරු කිරි සහ ධාන්‍ය නිෂ්පාදන සඳහා සීනි සහ මී පැණි එක්කරන බව පර්යේෂණයකින් හෙළිවීම නිසා මේ පැමිණිල්ල සිදුකරන බව ජාතික පාරිභෝගික පෙරමුණේ සභාපති අසේල සම්පත් මහතා ශ්‍රී ලංකා මිරර් සමඟ කියා සිටියේය.

එසේම නෙස්ලේ හි Nido හා Cerelac ගැන පිළිගත් විදේශීය ආයතනයකින් පරීක්ෂණයක් සිදු කිරීමට සැලැසුම් කරන බවද ඔහු පැවසීය.

නෙස්ලේ යනු ස්විට්සර්ලන්ත බහුජාතික සමාගමකි.

පබ්ලික් අයි (Public Eye) නම් ස්විට්සර්ලන්ත විමර්ශන සංවිධානයක පිරිසක් විසින් ආසියාවේ, අප්‍රිකාවේ සහ ලතින් අමෙරිකාවේ අලෙවි කරන නෙස්ලේහි ළදරු ආහාර නිෂ්පාදනවල සාම්පල පරීක්ෂා කිරීම සඳහා බෙල්ජියම් රසායනාගාරයකට යොමුකර තිබිණි.

වයස අවුරුදු එක සහ ඊට වැඩි ළදරුවන් සඳහා භාවිත කෙරෙන පිටි කිරි වර්ගයක සන්නාමයක් වන Nido සහ මාස හයේ සිට අවුරුදු දෙක දක්වා ළමුන් ආහාරයට ගන්නා ධාන්‍ය වර්ගයක් වන Cerelac සාම්පලවල සුක්‍රෝස් හෝ මී පැණි ආකාරයෙන් සීනි එකතු කර ඇති බව එහිදී අනාවරණ වී ඇති බව මාධ්‍ය වාර්තා කර තිබිණි.

එක්සත් රාජධානිය ඇතුළු නෙස්ලේහි ප්‍රධාන යුරෝපීය වෙලඳපොළවල කුඩා ළමුන් සඳහා නිකුත් කරන එම කිරිපිටි වර්ගයේ එකතු කළ සීනි තිබිය නොහැකිය.

වැඩිහිටි ළදරුවන් ඉලක්ක කරගත් සමහර ධාන්‍ය වර්ගවල සීනි එකතු කර ඇති අතර, මාස හයේ සිට අවුරුද්දක් දක්වා ළදරුවන් ඉලක්ක කරගත් නිෂ්පාදනවල එලෙස කිසිවක් අඩංගු කර නොමැත.

පබ්ලික් අයි (Public Eye)හි කෘෂිකාර්මික හා පෝෂණ විශේෂඥ ලෝරන්ට් ගේබරල් පවසන්නේ නෙස්ලේ සමාගම විසින් සිදුකරන මෙම භයානක දෙබිඩි පිළිවෙතට වහාම තිත තැබිය යුතු බවයි.

ලොව සෑම ප්‍රදේශයකම අවුරුදු තුනට අඩු ළමුන් සඳහා සියලුම නිෂ්පාදනවලදී සීනි එකතු කිරීම නැවැත්විය යුතු බව ඔහු ප්‍රකාශ කරයි.

අඩු සහ මධ්‍යම ආදායම් ලබන රටවල තරබාරුකම මේ වනවිට වඩ වඩාත් ගැටලුවක් බවට පත්ව තිබේ.

ලෝක සෞඛ්‍ය සංවිධානයේ (WHO) යුරෝපීය කලාපය සඳහා වන මාර්ගෝපදේශ පවසන්නේ වයස අවුරුදු තුනට අඩු ළමුන්ගේ කිසිදු ආහාරයකට එකතු කළ සීනි හෝ රසකාරකවලට ඉඩ නොදිය යුතු බවයි.

වෙනත් ප්‍රදේශ සඳහා නිශ්චිත මග පෙන්වීමක් ඉදිරිපත් කර නොමැති වුවද පර්යේෂකයන් පවසන්නේ යුරෝපීය මාර්ගෝපදේශ ලෝකයේ අනෙකුත් ප්‍රදේශවලට සමානව අදාළ වන බවයි.

බර වැඩිවීම සහ දත් දිරායාම ඇතුළු අවදානම් නිසා වයස අවුරුදු හතරට අඩු දරුවන් සීනි එකතු කළ ආහාරවලින් වැළකී සිටිය යුතු බව එක්සත් රාජධානිය ද නිර්දේශ කරයි.

එක්සත් ජනපද රජයේ මාර්ගෝපදේශ යටතේ ද අවුරුදු දෙකට වඩා අඩු අය සඳහා සීනි එකතු කරන ලද ආහාර සහ පානවලින් වැළකී සිටීම නිර්දේශ කරයි.

පබ්ලික් අයි (Public Eye) සංවිධානය අන්තර්ජාතික ළදරු ආහාර ක්‍රියාකාරී ජාලය සමඟ සහයෝගීව එළිදක්වා ඇති වාර්තාවේ දැක්වෙන්නේ වෙළඳපොළ පර්යේෂණ සමාගමක් වන Euromonitor Internationalහි දත්ත අනුව Cerelac නිෂ්පාදනය ඩොලර් බිලියනයකට වඩා වැඩි ගෝලීය සිල්ලර විකුණුම් සිදුකර ඇති බවයි.

ඉන් ඉහළම විකුණුම් සිදුකර ඇත්තේ අඩු සහ මධ්‍යම ආදායම් ලබන රටවල වන අතර විකුණුම්වලින් 40%ක්ම බ්‍රසීලයේ සහ ඉන්දියාවේ සිදුකර ඇත.

ලෝක සෞඛ්‍ය සංවිධානයේ වෛද්‍ය නිලධාරියකු වන වෛද්‍ය නයිජල් රෝලින්ස් පවසන්නේ මෙම සොයාගැනීම් සාධාරණීකරණය කළ නොහැකි දෙබිඩි පිළිවෙතක් පෙන්නුම් කරන බවයි.

මාස හය සහ ඊට වැඩි ළදරුවන් සඳහා දෙන බිස්කට් සහ රස කළ ධාන්‍ය වර්ග යටතේ සෙනගල් සහ දකුණු අප්‍රිකාවේ සෑම වේලකම එකතු කළ සීනි ග්‍රෑම් 6 අඩංගු බව පර්යේෂකයන් විසින් සොයාගෙන තිබේ.

ස්විට්සර්ලන්තයේ විකුණන එම වර්ගයේම නිෂ්පාදනවල සීනි කිසිවක් නැත.

ඉන්දියාවේ අලෙවි කරන Cerelac නිෂ්පාදන පිළිබඳ කළ පරීක්ෂණ මගින් හෙළිවී ඇත්තේ සාමාන්‍යයෙන් සෑම වේලකම එකතු කළ සීනි ග්‍රෑම් 2.7කට වඩා වැඩි ප්‍රමාණයක් පෙන්නුම් කරන බවයි.

බ්‍රසීලයේ, Cerelac මුසිලෝන් ලෙස හඳුන්වනු ලබන අතර, නිෂ්පාදන අටෙන් දෙකක් සීනි එකතු කර නොමැති බව සොයා ගන්නා ලදී.

කෙසේවෙතත් අනෙක් හයේ එක් වේලක ග්‍රෑම් හතරකට ආසන්න සීනි ප්‍රමාණයක් අඩංගු වී තිබිණි.

නයිජීරියාවේ, පරීක්ෂා කරන ලද එක් නිෂ්පාදනයක ග්රෑම් 6.8ක් දක්වා සීනි තිබී ඇත.

මේ අතර නෙස්ලේ ප්‍රකාශකයකු පවසා ඇත්තේ පෝෂණ ගුණය ගැන විශ්වාස කරන තම සමාගම දරුවන්ගේ වර්ධනයට සහ සංවර්ධනයට අනුවර්තනය වූ උසස් තත්ත්වයේ අමුද්‍රව්‍ය නිෂ්පාදන සඳහා භාවිත කිරීමට ප්‍රමුඛත්වය දෙන බවයි.

ඉහළින් නියාමනය කරන ළදරු ආහාර කාණ්ඩය තුළ, නෙස්ලේ සෑම විටම දේශීය රෙගුලාසි හෝ අන්තර්ජාතික ප්‍රමිතීන්ට අනුකූල සීනි අඩංගු කාබෝහයිඩ්‍රේට් අන්තර්ගතය ලේබල් කිරීමේදී නිෂ්පාදනවල සම්පූර්ණ සීනි ප්‍රමාණයන් ප්‍රකාශ කරන බවත් ඇය ප්‍රකාශ කර ඇත.

කෙසේවෙතත් නියාමනය සහ දේශීය අමුද්‍රව්‍ය ලබා ගැනීමේ හැකියාව ඇතුළු සාධක මත වට්ටෝරුවල වෙනස්කම් රඳා පවතින බව ද ඇය ප්‍රකාශකර තිබේ.

සුක්‍රෝස් සහ ග්ලූකෝස් සිරප් ලොව පුරා සිටින කුඩා දරුවන් ඉලක්ක කරගත් වර්ධනය සඳහා ලබාදෙන කිරිවලින් ඉවත් කර ඇති බව ද ඇය පැවසුවාය.

මූලාශ්‍රය – The Guardian

මාලදිවයින මාලේ ජාත්‍යන්තර ගුවන් තොටුපොළේ සිට ශ්‍රී ලංකාවේ කටුනායක ගුවන් තොටුපොළ අතර මාලදිවයිනේ ” මෝල්ඩිවියන්ස් ” ගුවන් සේවය ඍජු ගුවන් ගමන් සේවා ආරම්භ කරමින් ප්‍රථම මංගල ගුවන් යානය ඊයේ (25) රාත්‍රීයේ කටුනායක ගුවන් තොටුපොළ වෙත පැමිණෙන ලදී.

Q.2 – 940 දරන මෙම ගුවන් යානය ජල ආචාර පවත්වමින් පිළිගැනීමට කටුනායක ගුවන් තොටුපොළ බලධාරීන් පියවර ගෙන තිබුණි.

මෙතැන් සිට මෙම ගුවන් සේවයේ යානා සෑම සතියකම දින දෙකක් , එනම් බ්‍රහස්පතින්දා සහ සෙනසුරාදා කටුනායක සහ මාලදිවයින අතර ගුවන් ගමන් වල නිරත වීමට නියමිතය.

අඩු වියදම් ගුවන් සේවයක් වන මෙම ගුවන් සේවය තම ප්‍රථම මංගල ගුවන් ගමන සඳහා A.320 එයාර් බස් වර්ගයේ ගුවන් යානයක් යොදවා තිබූ අතර එම ගුවන් යානයෙන් මාලදිවයින ප්‍රවාහන සහ සිවිල් ගුවන් සේවා අමාත්‍ය කපිතාන් මොහොමඩ් අමීන් මහතා ද පැමිණ සිටියේය.

අමාත්‍යවරයා ඇතුළු එම ගුවන් යානයේ පැමිණි ගුවන් මගීන් පිළිගැනීම සඳහා වරාය , නාවික කටයුතු සහ ගුවන් සේවා අමාත්‍ය නිමල් සිරිපාල ද සිල්වා , මාලදිවයින ශ්‍රී ලංකා තානාපති රංග ගුණවර්ධන , ශ්‍රී ලංකාවේ මාලදිවයින තානාපති ඇඩම් සාදික් මහත්මිය , සීමාසහිත ගුවන් තොටුපොළ සහ ගුවන් සේවා සමාගමේ සභාපති ඉංජිනේරු අතුල ගල්කැටිය , ශ්‍රී ලංකා සිවිල් ගුවන් සේවා අධිකාරියේ අධ්‍යක්ෂ ජනරාල් සහ ප්‍රධාන විධායක නිලධාරී එයාර් වයිස් මාර්ෂල් සාගර කොටකදෙණිය මහතා ඇතුළු සම්භාවනීය ආරාධිත අමුත්තන් විශාල පිරිසක් කටුනායක ගුවන් තොටුපොළ වෙත පැමිණ සිටියහ.

‘ITC Ratnadipa Colombo’ අති සුඛෝපභෝගි හෝටලය ජනාධිපති රනිල් වික්‍රමසිංහ මහතා විසින් මීට සුළු වේලාවකට පෙර විවෘත කරන ලදී.

මෙම හෝටල් සංකීර්ණය ඉදිකර ඇත්තේ ඉන්දියානු සමාගමක් වන ITC Ltd හි පූර්ණ අනුබද්ධිත සමාගමක් වන WelcomHotels Lanka Ltd විසින් ය. 

එය ඉන්දියාවේ ITC හෝටල් සමූහය, ඉන්දියාවෙන් පිටත ඉදිකළ ඔවුන්ගේ පළමු සුඛෝපභෝගි හෝටලය වීම ද විශේෂත්වයකි.

මේ සඳහා කර ඇති ආයෝජනය අමෙරිකානු ඩොලර් මිලියන 400ක් වන අතර, එහි හෝටල් කාමර 350ක් පවතී.

ප්‍රධාන කුලුනු දෙකක් යා කරමින් අඩි 100ක් ඉහළ අහසේ ඉදි කෙරුණු අහස් පාලම මෙහි විශේෂත්වය වන අතර මෙරට එවැන්නක් ඉදි කෙරුණු පළමු වතාව ලෙස සැලකේ.

මෙහිදී අදහස් දක්වමින් ජනාධිපති රනිල් වික්‍රමසිංහ මහතා පවසා සිටියේ ජනතාව යළි අරගලයකට නොයන ආර්ථික තත්ත්වයක් රට තුළ නිර්මාණය කරන බවයි.
කඩා වැටුණු ආර්ථිකය වසර දෙකක් තුළ යළි ගොඩනැඟීමට හැකිවූ බව පෙන්වා දුන් ජනාධිපතිවරයා නැවත කඩා නොවැටෙන ආර්ථිකයක් රට තුළ ඇතිකර ජනතාවගේ ජීවන තත්ත්වය ඉහළ නැංවීමට කටයුතු කරන බව ද කියා සිටියේය.

මෙහිදී වැඩිදුරටත් අදහස් දැක්වූ ජනාධිපති රනිල් වික්‍රමසිංහ මහතා මෙසේද පැවසීය :

ITC සමාගම ශ්‍රී ලංකාවට සාදරයෙන් පිළිගන්නවා. ආසියාවේ පළමු තරු පහේ හෝටලය වන ගාලුමුවදොර හෝටලය මේ  අසල පිහිටා තිබෙනවා. ඒවගේම ඉන්දියානු ටාජ් හෝටලය ද මේ ආසන්නයේ පිහිටා තිබෙනවා. සිංගප්පූරුවෙන් පැමිණි ෂැංග්‍රිලා හෝටලයද පිහිටා තිබෙන්නේ මේ ආසන්නයේයි. ඒ සියල්ලන්ටම වඩා උසින් දැන් ITC රත්නදීප හෝටලයද තිබෙනවා. ඒ වගේම ඊට පසුපසින් සිනමන් ලයිෆ් හෝටලය තිබෙනවා.

මේ වන විට කොළඹ සංචාරක නගරයක් බවට පත් වී තිබෙනවා. තරු පංතියේ හෝටල්  නිසා සංචාරක ව්‍යාපාරයේ ඉදිරිය පිළිබඳ බලාපොරොත්තු තැබිය හැකියි.  කඩා වැටුණ ආර්ථිකය ගොඩනැංවීමටද  එය මහත් රුකුලක් වනු ඇතියි. සංචාරක ව්‍යාපාරය මගින් ලංකාවේ ආර්ථිකය කඩිනමින් ගොඩගත හැකියි . ඒ සඳහා අවශ්‍ය පහසුකම් ලබා දීමට අප සූදානම්. ඒ වගේම නැවත අරගලයක් ඇති නොවන ආර්ථිකයක් බිහි කළ යුතුයි. ඒ සඳහා අවශ්‍ය සැලසුම් අප ක්‍රියාවට නංවනවා. මේ සියලු සැලසුම් මගින් ශ්‍රී ලංකාවේ ආර්ථිකය ස්ථාවර කළ හැකියි.එවිට ජනතාවගේ ජීවන ත්ත්වයද උසස් කළ හැකියි.

අග්‍රාමාත්‍ය දිනේෂ් ගුණවර්ධන, හිටපු ජනාධිපතිවරුන් වන චන්ද්‍රිකා බණ්ඩාරනායක කුමාරතුංග, ගෝඨාභය රාජපක්ෂ, අමාත්‍යවරුන් වන ජනාධිපති නීතිඥ අලි සබ්‍රි, ප්‍රසන්න රණතුංග, ජාතික ආරක්ෂාව පිළිබඳ ජනාධිපති  ජ්‍යෙෂ්ඨ උපදේශක හා ජනාධිපති කාර්‍ය මණ්ඩල ප්‍රධානි සාගල රත්නායක, හිටපු අමාත්‍ය රවී කරුණානායක, ශ්‍රී ලංකාවේ ඉන්දියානු මහකොමසාරිස් සන්තුෂ් ජා ,ත්‍රිවිධ හමුදා මාණ්ඩලික ප්‍රධානී ජෙනරාල් ශවේන්ද්‍ර සිල්වා, ITC රත්නදීප  සමූහයේ සභාපති හා කළමනාකරණ අධ්‍යක්ෂ සන්ජීව් පුරි මහත්වරු ඇතුළු පිරිසක් මෙම අවස්ථාවට එක්ව සිටියහ.