ආරක්ෂක ලේකම් ජෙනරාල් (විශ්‍රාමික) කමල් ගුණරත්න සහ යුද හමුදාපති ලුතිනන් ජෙනරාල් විකුම් ලියනගේ යළිත් වරක් පාර්ලිමේන්තුවේ ආචාර ධර්ම හා වරප්‍රසාද කාරක සභාවට කැඳවන ලෙසට ගාල්ල දිස්ත්‍රික් මන්ත්‍රි චන්දිම වීරක්කොඩි පාර්ලිමේන්තුවේ දී කළ ඉල්ලීම කථානායක මහින්ද යාපා අබේවර්ධන විසින් එම කාරක සභාවට යොමු කරනු ලැබ තිබේ.

කථානායකවරයා මේ බව පසුගිය 24 වැනිදා පාර්ලිමේන්තුවට දැනුම් දුන්නේය. මන්ත්‍රිවරයා ඉහත ඉල්ලීම කළේ පසුගිය මාර්තු මස 6 වැනිදා ය.

මන්ත්‍රිවරයාගේ එම ඉල්ලීමට හේතු වූයේ පාර්ලිමේන්තු ආචාර ධර්ම හා වරප්‍රසාද පිළිබඳ කාරක සභාවේ නිර්දේශ විකෘති කරමින් ආරක්ෂක අමාත්‍යාංශය ‘සතිඅග අරුණ’ පුවත්පතට යවා ඇති ලිපියකි.

සන්නද්ධ හමුදාවල කාර්ය මණ්ඩලය ලක්ෂයක් දක්වා අඩු කිරීමේ යෝජනාවක් සම්බන්ධයෙන් ජාතික ආරක්ෂාව පිළිබඳ ආංශික අධීක්ෂණ කාරක සභාවේ දී මන්ත්‍රිවරයා සහ ආරක්ෂක ලේකම්වරයාත් යුද හමුදාපතිවරයාත් අතර ඇති වූ මතභේදයක් මෙම තත්ත්වයට හේතු වී තිබිණි. කාර්ය මණ්ඩලය අඩු කිරීමට විකල්පයක් වශයෙන් මන්ත්‍රිවරයා සඳහන් කර ඇත්තේ සන්නද්ධ හමුදාවේ ඉහළ නිලධාරීන්ට ලබා දී තිබෙන පහසුකම් අඩු කිරීම යෝග්‍ය බවය. මෙම අවස්ථාවේ දී ආරක්ෂක ලේකම්වරයා සහ යුද හමුදාපතිවරයා තමන් බිය ගන්වමින් සහ තර්ජනය කරමින් තමන් සමග වාද කළ බවට මන්ත්‍රිවරයා කර තිබූ පැමිණිල්ලක් විමර්ශනය කළ කාරක සභාව ඒ සම්බන්ධයෙන් නිලධාරීන් දෙදෙනා මන්ත්‍රිවරයාගෙන් සමාව අයැදිය යුතු බවට නිර්දේශ කර තිබිණි.

ඒ සම්බන්ධයෙන් කරුණු පැහැදිලි කර තිබූ ආරක්ෂක අමාත්‍යාංශය සඳහන් කර තිබුණේ නිලධාරීන් දෙදෙනා මන්ත්‍රිවරයාට නොව කාරක සභාවට කනගාටුව පළ කිරීමෙන් ගැටලුව සමථයකට පත් වූ බව ය.

මන්ත්‍රිවරයා දෙවැනි වරටත් වරප්‍රසාද ප්‍රශ්නයක් මතු කරමින් මෙම නිලධාරීන් දෙදෙනා යළි වරප්‍රසාද පිළිබඳ කාරක සභාවට කැඳවන ලෙස කථානායකවරයාගෙන් ඉල්ලා සිටියේ එම ප්‍රකාශය සත්‍ය නොවන බව පෙන්වා දෙමිනි.

‘‘ඇත්තටම එදා මනුස්සකමට මම එකඟ නොවුණා නම් දඬුවම් ලැබෙන්නෙ උසාවියෙන්. කාරක සභා පනත අනුව එවන් වරදකට දඬුවම් කරන්න කාරක සභාවට බලයක් නැහැ. එවන් වරදකට දඬුවම් දිය හැකි වන්නේ ශ්‍රේෂ්ඨාධිකරණයෙන් පමණක් බව පනතේ සඳහන් කර තිබෙනවා. අමාත්‍යාංශය පුවත්පතට කර තිබෙන පැහැදිලි කිරීම අනුව වරප්‍රසාද පනත උල්ලංඝනය කර තිබෙනවා. පාර්ලිමේන්තුව සමච්චලයට ලක්කරමින් මේ ආකාරයට හැසිරීම සම්බන්ධයෙන් මම කථානායකතුමාගේ අවධානය යොමු කරනවා. මෙම පුද්ගලයන් දෙදෙනා වරප්‍රසාද කමිටුවට කැඳවා පනත යටතේ කටයුතු කරන ලෙස මම ඉල්ලීමක් කරනවා. පාර්ලිමේන්තුව අද විශාල වශයෙන් විහිළුවට ලක් වෙලා. මෙවැනි කටයුතු නිසා තවදුරටත් පාර්ලිමේන්තුව හෑල්ලුවට ලක් විය හැකියි. මේ සම්බන්ධයෙන් වරප්‍රසාද පනතේ ප්‍රතිපාදන යටතේ කටයුතු කරන ලෙස ඉල්ලා සිටිනවා. ’’යැයි ද මන්ත්‍රිවරයා කීවේය.

කථානායකවරයා වරප්‍රසාද කාරක සභාවට යොමු කර ඇත්තේ මෙම ඉල්ලීම වන අතර පාර්ලිමේන්තු ආරංචි මාර්ග සඳහන් කළේ මේ පිළිබඳ විමර්ශනයට ආරක්ෂක ලේකම්වරයා සහ යුද හමුදාපතිවරයා යළි කැඳවන බව ය.

(අරුණ)

නව තානාපතිවරයෙක්, අමාත්‍යාංශ ලේකම්වරයෙක් සහ ආයතන සභාපතිවරයන් දෙදෙනෙක් පත් කිරීම සඳහා පසුගියදා පාර්ලිමේන්තුවේදී රැස්වූ උසස් නිලතල පිළිබඳ කාරක සභාව අනුමතිය ලබා දී තිබේ.

ඒ අනුව ඉතාලි ජනරජයේ නව ශ්‍රී ලංකා තානාපතිවරයා ලෙස එස්.ඒ රොද්‍රිගෝ මහතා පත් කිරීමට උසස් නිලතල පිළිබඳ කාරක සභාව අනුමතිය ලබා දී තිබේ.

එයට අමතරව, ජල සම්පාදන සහ වතු යටිතල පහසුකම් සංවර්ධන අමාත්‍යාංශයේ නව ලේකම්වරයා ලෙස ඒ. සී.එම්. න‍ෆීල් මහතා පත් කිරීමටද උසස් නිලතල පිළිබඳ කාරක සභාව අනුමතිය ලබා දී තිබේ.

තවද ප්‍රාදේශීය සංවර්ධන බැංකුවේ නව සභාපතිවරයා ලෙස ඩබ්ලිව්. ඒ. ඩී.එස් ගුණසිංහ මහතා පත් කිරීමට සහ ශ්‍රී ලංකා පරමාණුක බලශක්ති නියාමන සභාවේ නව සභාපතිවරයා ලෙස එන්.කේ.එස්. ජයසේකර මහතා පත් කිරීමටද උසස් නිලතල පිළිබඳ කාරක සභාව අනුමතිය ලබා දී තිබේ.

කථානායක මහින්ද යාපා අබේවර්ධන මහතාගේ ප්‍රධානත්වයෙන් රැස්වූ උසස් නිලතල පිළිබඳ කාරක සභාවට අමාත්‍යවරයන් වන වෛද්‍ය රමේෂ් පතිරණ, විදුර වික්‍රමනායක සහ පාර්ලිමේන්තු මන්ත්‍රී රිෂාඩ් බදියුදීන් යන මහත්වරු සහභාගී වූහ.

එක්සත් ජනපද කෘෂිකර්ම දෙපාර්තමේන්තුවේ (USDA) වෙළඳ සහ විදේශ කෘෂිකාර්මික කටයුතු සඳහා උප ලේකම්තුමිය වන ඇලෙක්සිස් ටේලර් මහත්මිය එ.ජ. තානාපති ජුලී චංග් මහත්මිය සමගින්, අද (26) කොළඹ දී, ශ්‍රී ලංකාවේ කෘෂිකාර්මික අංශයට USDA සහය ලබාදීම සම්බන්ධයෙන් සාකච්ඡා කිරීම සඳහා ශ්‍රී ලංකාවේ ජනාධිපති රනිල් වික්‍රමසිංහ මහතා සහ අනෙකුත් ජ්‍යේෂ්ඨ රජයේ නිලධාරීන් හමුවිය.

වඩාත් වැඩි ආහාර සුරක්ෂිතතාවයක් ප්‍රවර්ධනය කරමින්, දේශගුණ අභියෝගවලට ඔරොත්තුදීම වැඩිදියුණු කරමින් ශ්‍රී ලංකාවේ කෘෂිකාර්මික සංවර්ධනය සහ ආර්ථික වර්ධනය සඳහා සහය දෙන්නට ඇමෙරිකානු ජනතාවගේ අඛණ්ඩ කැපවීම ටේලර් උපලේකම්තුමියගේ මෙම සංචාරයෙන් අවධාරණය කරන ලදී.

සිකුරාදා දින උපලේකම්තුමිය සිදුකළ සාකච්ඡා තුළ පරිසර හිතකාමී ව්‍යවහාර සහ වෙළඳපල සම්බන්ධතා වැඩිදියුණු කිරීම හරහා ආහාර සුරක්ෂිතතාවය සහ දේශගුණ ප්‍රත්‍යස්ථතාවය වැඩිදියුණු කිරීම කෙරෙහි අවධානය යොමු කරන මුලපිරීමක් වන 2024 අභිවෘද්ධිය සඳහා ආහාර (Food for Progress) මුලපිරීමෙහි ප්‍රමුඛතාවය ලබන රටක් වශයෙන් ශ්‍රී ලංකාවට ලැබී ඇති ප්‍රධාන භූමිකාව තහවුරු කරන ලදී. එහි ලා ප්‍රධාන වශයෙන් අවධානය යොමු කෙරුනේ ශ්‍රී ලංකාවේ කිරි ගොවීන් 15,000 ඉක්මවන පිරිසක කිරි නිෂ්පාදන ඵලදායීතාවය වැඩිදියුණු කරන්නට හේතුවූ, සහ ඉන් බොහෝ දෙනෙක් මෙම ව්‍යාපෘතිය හේතුවෙන් තම නිෂ්පාදනය දෙගුණ වු බව ද සඳහන් කර තිබූ, ඩොලර් මිලියන 27.5ක වෙළඳපල-දිශානත කිරි නිෂ්පාදන ව්‍යාපෘතිය වෙතයි. මෙම USDA කිරි නිෂ්පාදන ව්‍යාපෘතිය හරහා, අනවශ්‍ය බලශක්ති පරිභෝජනය අඩු කරන ගව පාලන සහ සත්ව ආහාර පරිභෝජන ක්‍රමෝපායයන් ගැන පුළුල් පුහුණු ලබාදීම හරහා කිරි ගොවීන් අතරේ දේශගුණ අභියෝගවලට අනුහුරුවීම වැඩිදියුණු කරන්නට ද අරමුණු කරයි.

ඊට අමතරව, 2018 සිට අධ්‍යාපන අමාත්‍යාංශයේ හවුල්කාරීත්වය ඇතිව සේව් ද චිල්රන් හරහා ක්‍රියාත්මක වූ USDA හි මැක්ගවර්න්-ඩෝල් ව්‍යාපෘතිය හරහා, රටපුරා ප්‍රාථමික පාසැල් දරුවන් 100,000ට ආසන්න සංඛ්‍යාවකට දිනපතා ආහාරවේල් ලබාදී තිබේ. එම වැඩසටහනේ සාර්ථකත්වය මත පදනම් වෙමින් USDA නව පස් වාර්ෂික, ඩොලර් මිලියන 32.5ක ව්‍යාපෘතියක් දියත් කර තිබේ. පාසල්වලට ආහාරවේල් ලබාදීමේ වැඩසටහන තවත් ශක්තිමත් කරමින් ඒ හරහා බදුල්ල, කොළඹ, කිලිනොච්චිය, මොනරාගල, මුලතිවු, නුවරඑළිය, රත්නපුර, සහ ත්‍රිකුණාමලය ඇතුළු දිස්ත්‍රික්ක අටකට ආහාරවේල් ලබාදෙනු ලැබේ. ශ්‍රී ලංකාවේ පාසල්වලට ආහාර වේල් ලබාදීමේ ජාතික වැඩසටහන යටතේ ආවරණය වන සිසුන් 200,000කට ආසන්න පිරිසක් සඳහා දැන් මේ ව්‍යාපෘතිය හරහා ආහාර වේල් ලබාදීමට අරමුණු කරනු ලැබේ.  

ස්ථාවරත්වය සහ සෞභාග්‍ය පෝෂණය කිරීමේ පුළුල් අරමුණෙහි කොටසක් වශයෙන්, USDA සහය ඇතිව ශ්‍රී ලංකාවේ ආහාර සුරක්ෂිතතාවය වැඩිදියුණු කිරීමට එක්සත් ජනපදය කැප වී සිටියි. කෘෂිකර්මාන්තයේ හවුල්කාරීත්ව සඳහා ආයෝජනය කිරීමෙන් අපේ අරමුණ වන්නේ දේශීය ගොවීන් සවිබල ගන්වා, ආහාර නිෂ්පාදනය වැඩි කර, සියළු දෙනාටම වඩාත් සුරක්ෂිත අනාගතයක් සහතික කිරීමයි.

Pleased to welcome @USDA’s Under Secretary for Trade and Foreign Agricultural Affairs Alexis Taylor to Sri Lanka. While she is here, Under Secretary Taylor will meet with government, civil society, and recipients of U.S. support through our school feeding and market oriented… pic.twitter.com/T7ziOMnJGH

— Ambassador Julie Chung (@USAmbSL) April 26, 2024